विगत वर्षबाट शिक्षा लिदै नयाँ वर्षलाई उपव्धिमूलक बनाउन प्रण गर्ने दिन

हलेसीन्युजडेस्क, खोटाङ

आज विक्रम सम्वतको पात्रोअनुसार नयाँ वर्षको पहिलो दिन । विभिन्न आरोह अवरोहलाई व्यतित गर्दै आज मध्यरातबाट २०८० सालको समापनसँगै २०८१ साल प्रारम्भ भएको हो । 

हरेक १ वैशाखलाई विक्रम संवतको पात्रोअनुसार नयाँ वर्षको रुपमा मनाउने गरिएको छ । त्यसैले यस दिनलाई नेपाल तथा विश्वभर छरिएर रहेका नेपालीले विशेष महत्वका साथ मनाउने गर्छन् ।

विक्रम संवत पात्रोअनुसार सौर्यमानक हिसाबले १ वैशाखमा नयाँ वर्ष मनाइन्छ भने चन्द्रमानक हिसाबले चैत्र शुक्ल प्रतिपदा तिथिका दिन नयाँ वर्ष मनाइन्छ । वि.सं. हिन्दू पञ्चांगमा आधारित भएर निर्माण गरिएको पात्रो मानिन्छ ।

नयाँ वर्षका अवसरमा नेपालीहरु एकापसमा सद्भाव र शुभकामना आदानप्रदान गर्दछन् । त्यसअघिको अन्तिम साँझ तथा रात साथीभाइ, इष्टमित्र भेटघाटसहित रमाइलो गरी वर्षान्त मनाउने गरिन्छ ।

नयाँ वर्षमा धार्मिक आस्था राख्नेहरुले मठमन्दिरमा गई पूजाआजा गर्ने पनि गर्दछन् । विगतका कामको समीक्षा गर्दै कमजोरी सुधारेर नयाँ जोश र जाँगरका साथ आफ्नो कर्मक्षेत्रमा लाग्न नयाँ वर्षका अवसरमा प्रण पनि गर्ने गरिन्छ ।

नयाँ वर्षको अवसरमा खोटाङका विभिन्न स्थानहरुमा खेलकुद, शुभकामना आदान प्रदान कार्यक्रम, पिकनिक लगायत विभिन्न कार्यक्रम गरी मनाइदैछ ।

सामुदायिक रेडियो हलेसी एफएम यो अवसरमा सम्पूर्ण श्रोता महानुभावहरुका साथै स्वदेश तथा विदेशमा रहनुहुने सम्पूर्ण  आमाबुवा, दाजुभाई, दिदीबहिनीहरुमा हार्दिक मंगलमय शुभकामना व्यक्त गर्दछ ।

[ सम्झनामा एक वर्ष अगाडि--नयाँ दशकको ढोका खोल्दै नववर्ष २०८० को शुभआगमन }