हलेसीन्युजडेस्क, खोटाङ /

खोटाङका चर्चित साहित्यकार डा. पुरण राईका कृतिहरुमाथि विहंगम समिक्षात्मक चर्चा तथा खोटाङका पाँच सर्जक तथा समाजसेवीको सम्मान गरिने भएको छ । पालिका अभिलेख प्रालि काठमाण्डौँले आगामी भाद्र १५ गते शुभम फाउण्डेशनको सभाहलमा श्रष्टा साहित्यकार डा. पुरण राईका एकैसाथ प्रकाशित पाँच कृतिहरु मध्ये वशन्त रितु उपन्यास र लाशमाथिको मानवता नाटकमा विहंगम समिक्षात्मक चर्चाका साथै खोटाङ जिल्लामा जन्मेर साहित्यिक क्षेत्र र समाज सेवामा लागेका पाँच व्यक्तित्वहरुलाई सम्मान गरिने भएको हो ।

पालिका अभिलेख प्रालि तथा शुभम फाउण्डेशनको संयुक्त आयोजनामा हुने सो कार्यक्रममा खोटाङका साहित्यकार एवं समालोचक वेदी राई बाट उपन्यास वशन्त रितु माथि समिक्षा रहनेछ भने अर्का साहित्यकार एमसी सुमितले नाटक लाशमाथिको मानवतामाथि समिक्षा गर्नुहुने जनाइएको छ ।

दिक्तेल रुपाकोट मझुवागढी नगरपालिका वडा नं. १४ वुइपा छापगाउँ निवासी डा. पुरण राई साहित्यिक क्षेत्रका कृयाशिल हस्ताक्षर हुनुहुन्छ । उहाँको सबैभन्दा पहिलो कृति देशको भूगोल कविता संग्रह २०६१ सालमा प्रकाशित भएको थियो । तत्पश्चात उहाँले एकैसाथ पाँच कृतिहरु आप्रवाशी नेपाली कवितामा अलंकार विधा, डरका विम्वहरु, अस्तु कथासंग्रह, वशन्त रितु उपन्यास र लाशमाथिको मानवता नाटकको प्रकाशन गर्नुभएको हो ।