हलेसीन्युजडेस्क, खोटाङ

खोटाङको जन्तेढुङ्गा गाउँपालिकाले उभौली साकेन्वा छोङ्खा पुजाको अवसरमा  पालिकामा एक दिन स्थानीय पर्व विदा दिने निर्णय गरेको छ । सम्पूर्ण किराँत राई समुदायकै पुरानो र जेठो  साकेन्वा मानिने ऐतिहासिक छोङ्खा साकेन्वा किराँत राईहरुको मात्र नभई अन्य जातजाती र धर्मावलम्वीहरुको पनि आस्था र विस्वासको प्रतिकका रुपमा मानिदै आएको साकेन्वा छोङ्खा पुजाको अवसरमा  जेष्ठ २२ गते सोमवारका दिन पालिकाभरी स्थानीय पर्वका रुपमा विदा दिने निर्णय गरिएको हो ।

किराँत छोङ्खा साकेन्वाको सम्बन्धमा छुट्टै किराँत मिथक सुन्न पाइन्छ । आदिम कालदेखि नै छोङ्खा साकेन्वाको पवित्र स्थान डमर्खुशिवालयमा रहेको किराँत मान्यता छ । परापूर्व कालदेखि नै जन्तेढुङ्गा गाउँपालिका वडा नं. ४ डमर्खुशिवालयमा वर्षको दुई पटक किराँत सँस्कृति अनुसार छोङ्खा साकेन्वा पुजा गरिने परम्परा छ ।  किराँत विजुवाहरुले मुन्द्धुमी रिसिया गाउँदै जेष्ठ महिनामा उभौली र मंसिर महिनामा उधौली छोङ्खा साकेन्वा पुजा गर्दछन् ।

 यो वर्ष जेष्ठ २२ गते सोमवार उक्त वडामा उभौली छोङ्खा साकेन्वा पुजाको तिथी परेको हुँदा उक्त अवसरमा पालिकाले स्थानीय विदा घोषित गरेको हो । उक्त दिन गाउँपालिकाको कार्यालय र मातहतका सबै कार्यालयमा सार्वजनिक विदा दिइने पालिका अध्यक्ष अरुणादेवी राईले जानकारी दिनुभएको छ ।