हलेसीन्युजडेस्क, खोटाङ /

खोटाङको जन्तेढुंगा गाउँपालिकास्थित चिसापानीबजारमा “मुन्दुम सँस्कृति र यसको सिकाई’’ विषयक विचार गोष्ठी सम्पन्न भएको छ । किरात मुन्दुम अध्ययन केन्द्रको आयोजना तथा जन्तेढुङ्गा गाउँपालिकाको प्रायोजनमा मंसिर २२ गते “मुन्दुम सँस्कृति र यसको सिकाई’’ शिर्षकमा गाउँपालिकाको सभाहलमा एकदिने बिचार गोष्ठी सम्पन्न भएको हो ।

जन्तेढुंगा गाउँपालिका वडा नं. ६ दिप्लुङका वडाध्यक्ष सागर राईको अध्यक्षता तथा गाउँपालिका अध्यक्ष अरुणादेवी राईको प्रमुख आतिथ्यतामा भएको विचार गोष्ठीमा डाक्टर शान्तिदेवी राईले कार्यपत्र प्रस्तुत गर्नु भएको थियो । मुन्दुम सँस्कृतिको उद्भव र विकास, प्रकृतिसँगको यसको तादाम्यता र यसलाई कसरी मुन्दुमी जीवनमा कृयान्वयन गर्ने भन्ने मुल भाव कार्यपत्रले प्रस्तुत गरेको जनाइएको छ । 
उक्त कार्यपत्रमाथि उठेका जिज्ञासाहरुको बारेमा मुन्दुम अध्ययन केन्द्रका अध्यक्ष, गायक, संगीतकार, गीतकार तथा संस्कृतिविज्ञ जीतेन राईले प्रष्ट्याउनु हुँदै अन्तमा आफ्नो धारणा समेत राख्नु भएको थियो । 

कार्यक्रममा स्थानीय जनप्रतिनिधिहरु, कलेजका प्राचार्य, चिसापानी माविका प्र.अ एवं शिक्षकहरु, किरात राई भाषिक संंस्थाका प्रमुखहरुले मन्तव्य र जिज्ञासा राख्नु भएको थियो । 

कार्यक्रमको सहजिकरण सन्तोष निरा राईले गर्नुभएको थियो ।