हलेसीन्युजडेस्क, खोटाङ /

नेपालीहरुको दोस्रो ठूलो चाँड तिहारको तेस्रो दिन आज लक्ष्मीको आराधना तथा पूजा गरिँदैछ । यसवर्ष तिथिको घटबढका कारण यमपञ्चक अर्थात् दीपावली पर्वको दोस्रो दिन मानिने कुकुर तिहार पनि आजै पर्न गएको छ । त्यसैले आज बिहान कुकुर पूजा गरेर बेलुकी लक्ष्मी पूजा गर्नुपर्ने नेपाल पञ्चाङ्ग निर्णायक विकास समितिले जनाएको छ ।

कात्तिक कृष्ण चतुर्दशीका दिन कुकुरलाई मनपर्ने परिकार खान दिए यमराजको ढोकामा द्वारपालका रूपमा बस्ने श्याम र सबल नामका कुकुरले यमलोक जाँदा बाटो छोडिदिने धार्मिक विश्वासका आधारमा कुकुर तिहार मनाउने गरिएको धर्मशास्त्रमा उल्लेख छ ।

आजै लक्ष्मीपुजा पनि गरिन्छ । लक्ष्मी खुशी भएमा धन सम्पति भरिपूर्ण हुने धार्मिक विश्वासमा आज बिहानै घर सफा सुग्घर र गाईको गोबर एवं रातोमाटोले लिपपोत गरी दीपावली गरेर लक्ष्मीलाई आमन्त्रण गरिन्छ । आज विशेषगरी घरका झ्याल, ढोका, चोटा, कोठा, संघार, कौसी, अटाली र भ¥याङलगायतका स्थानमा सरसफाइ गरी दीपावली गरिन्छ । यस पर्वलाई दीपमालिका पनि भनिन्छ ।
दीपावली गरिसकेपछि पूजा कोठामा दीयो, कलश र गणेशसहित लक्ष्मी, कुबेर स्थापना गरेर गरगहना, पैसा, धान, चामल, फलफूल, सेलरोटी र फूलमाला चढाई विधिपूर्वक लक्ष्मीको पूजा आराधना गरिन्छ ।

आज साँझ महिला दिदीबहिनीहरु घरघरमा भैलो खेल्छन् । भगवान् विष्णुले यमपञ्चकको पाँच दिन स्वर्ग, मत्र्य र पाताल तीनै लोकको शासन गर्ने वरदान बलिराजालाई दिनुभएको विभिन्न हिन्दू धर्मग्रन्थमा उल्लेख छ । वरदान पाएका बलिराजाले भलो होस् भनी घरघरमा गाउन लगाएको सम्झनामा भैलो खेल्ने गरिएको हो । 

[गत वर्षको खवर-तिहारको दोश्रो दिन ः आजै लक्ष्मीपुजा र कुकुर तिहार ]