हलेसीन्युजडेस्क, खोटाङ /

खोटाङको दिक्तेलवजारमा आज साकेला सिलि प्रतियोगिता हुदैछ । किरात राई यायोक्खा जिल्ला कार्य समिति खोटाङ र किराँत सेवा समाज दिक्तेल खोटाङको संयुक्त आयोजनामा दिक्तेलको माटिकोरेस्थित खेलमैदानमा आज आषाढ १ गते शनिवार विहान ११ वजेदेखि किराँत सँस्कृति र परम्परा अनुसार साकेला सिलि प्रतियोगिता  हुने भएको हो । 

किरातहरुको महान पर्व साकेला उभौलि २०८१ तथा किराँत एलेसम्वत ५०८४को अवसरमा आयोजना हुन लागिरहेको साकेला सिलि प्रतियोगिताका साथै आजबाट यो वर्षको साकेला उभौलीको समापन समेत गरिने आयोजकले जनाएको छ ।

साकेला उभौली किराँतहरूको महान चाँड हो । प्रत्येक वर्ष बैशाख पुर्णिमा देखि किराँत सँस्कृति र परम्परा अनुसार भव्य रूपमा प्रकृति र भूमिको पूजा गरी साकेला सिलि नाच्दै १ महिना सम्म सोकला उभौलि मनाउने गरिन्छ । 

साकेला समापन सँगै साकेला नाँचमा प्रयोग हुने ढोलझ्याम्टा लगायत सामाग्रीहरु पुजा गरेर थान्कोमा राख्ने चलन छ ।

आज आषाढ १ गते यो वर्षको साकेला उभौलिलाई विदा गर्दै साकेला सिलि प्रतियोगिताको आयोजना गरेर प्रतियोगितामा उत्कृष्ट हुने सहभागीहरुलाई पुरस्कृत गरिनेछ । 

विभिन्न सिलिमा प्रदर्शनी हुने सहभागीहरुमध्ये प्रथम हुने समूहलाई रु २० हजारका साथ प्रमाण पत्र दिइने जनाइएको छ । त्यस्तै दोश्रो, तेश्रो र सान्त्वना हुने समूहहरुलाई क्रमश, रु १५ हजार, रु १० हजार र रु ५ हजारका साथ प्रमाणपत्र प्रदान गरिने आयोजकले जनाएको छ । प्रतियोगिहरुले अनिवार्य किराँत भेषभुषा लगाउन पर्ने जनाइएको छ । 

प्रतियोगिताका साथ साकेला सिलि प्रदर्शनी निकै रोचक र भव्य हुने आकलन गरिएको छ ।