हलेसीन्युजडेस्क, खोटाङ /

खोटाङको रावाबेसी गाउँपालिका वडा नम्बर ५ दुबेकोल स्थित स्थानीय वीरबहादुर गुरुङको फुसको छानो भएको दुर्ई वटा घर जलेर नष्ट भएको छ । आज अपरान्ह २ वजे आसपास आगलागीबाट गुरुङको घर र त्यहाँ भएको खाद्यान्न, लत्ताकपडा, भाँडावर्तन लगायतका अन्य सामग्री जलेर नष्ट भएको हो । 

मानव बसोबास नभएकाले जनको क्षति  नभएको जिल्ला प्रहरी कार्यलय खोटाङका प्रमुख प्रहरी नायव उपरिक्षक प्रतिक बिष्टले बताउनु भएको छ ।

आज अपरान्ह २ बजेतिर अचानक गुरुङको घरमा आगलागी भएपछि छिमेकीहरुले चाल पाएर घटनास्थलमा पुगी आगो निभाउने प्रयास गरेपनि  आगलागीबाट दुवैघर जोगाउन नसकिएको र आगलागी कसरी भयो भन्ने एकिन  थाहा नभएको रावाबेसी गाउँपालिका ५ दुबेकोलका वडाध्यक्ष मोहन गुरुङले बताउनु भयो ।  

घर पुर्ण रुपमा जलेर नष्ट भइसकेपछि लामो प्रयासबाट स्थानीय र प्रहरीको सहयोगमा आगलागी नियन्त्रणमा लिइएको अध्यक्ष गुरुङले बताउनुभयो । 

वीरबहादुर गुरुङको ३ वटा घर मध्ये मूल घरमा टिनको छानो भएका कारण उक्त घर मात्र जोगाउन सकिएको छ । आगोलागी बाट के कति क्षति भयो विवरण  संकलन गरे पछि थाहा हुने प्रहरी श्रोतले जनाएको छ ।

यो वर्ष सुख्खा खडेरी शुरु हुनु अगावै जिल्लामा छिटपुट आगजनीको घटना भैरहेकोमा चिन्ताको विषय बनेको प्रहरी नायव उपरिक्षक विष्टको कथन छ । उहाँ भन्नुहुन्छ —‘यस तर्फ स्थानीय सरकार, सरोकार वाला पक्ष लगायत जिल्लाका आम नागरिकहरुले सचेतनामूलक गतिविधि बढाउनु जरुरी छ ।’