दिक्तेल रुपाकोट मझुवागढी नगरपालिकाले फागुण १५, १६ र १७ गते रााष्ट्रिय बाँस सम्मेलन गर्ने

हलेसीन्युजडेस्क, खोटाङ /

खोटाङको दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईले नगर कार्य पालिकाद्धारा गरिएका महत्वपूर्ण निर्णयहरुको बारेमा जानकारी गराउन जिल्लास्थित पत्रकारहरुको भेटघाट कार्यक्रमको आयोजना गर्नुभएको छ । मंसिर १३ गते नगर कार्य पालिकाको बैठकद्धारा दिक्तेल रुपाकोट मझुवागढी नगरपालिकामा हुने प्रथम राष्ट्रिय बाँस सम्मेलन, रेडपाण्डा तथा थार महोत्सव लगायत अन्य महत्वपूर्ण विषयहरूमा गरिएको निर्णयहरु सार्वजनिक गराउँदै नगरप्रमुख भट्टराईले आज मंसिर १४ गते अपरान्ह १.०० वजे नगरपालिकाको सभाहलमा स्थानीय पत्रकारहरुको भेटघाट कार्यक्रमको आयोजना गर्नुभएको हो ।

पत्रकार भेटघाट कार्यक्रममा नगरप्रमुख भट्टराईले जिल्लाकै ऐतिहासिक कार्यको रुपमा लिइएको प्रथम बाँस सम्मेलन अशोज महिनामा आएको बाढी पहिरो जस्ता प्राकृतिक प्रकोपका कारण निर्धारित समयमा गर्न नसकिएको बताउनुभयो ।

गत अषाढ ६ गते नगर कार्यपालिका बैठकबाट बाँसको क्षेत्रमा लामो अध्ययन गर्नु भएका विषयविज्ञ, विभिन्न विश्व विद्यालयका प्राध्यापक, बाँसको महत्वलाई बुझ्दै आय आर्जन गरिरहेका उद्यमी, व्यवसायीहरूको उपस्थिति र  तात्कालिन विज्ञान तथा प्रविधि मन्त्रालयका पूर्वमन्त्री गणेश साहको नेतृत्वमा बनेको राष्ट्रिय आयोजक समितिसँंगको समन्वय र सहकार्यमा गत कार्तिक २ देखि ४ गतेसम्म दिक्तेल रुपाकोट मझुवागढी नगरपालिकामा प्रथम राष्ट्रिय बाँस सम्मेलन गर्ने निर्णय भएकोमा असोज महिनामा आएको बाढी, पहिरो जस्ता प्राकृतिक प्रकोप लगायत विविध कारणले निर्धारित समयमा सो सम्मेलन गर्न सम्भव नभएको नगरप्रमुख भट्टराईको स्पष्टोक्ति थियो ।

उहाँले अगाडि भन्नुभयो–‘ विज्ञान तथा प्रविधि मन्त्रालयका पूर्वमन्त्री साहको नेतृत्वमा बनेको राष्ट्रिय आयोजक समितिको बैठकबाट उक्त स्थगित रहेको राष्ट्रिय बाँस सम्मेलन आगामी फाल्गुण १५, १६ र १७ गते नेपालकै पहिलो सम्मेलनको रुपमा हाम्रैे शुन्दर  दिक्तेल रुपाकोट मझुवागढी नगरपालिकामा ऐतिहासिक महोत्सवका रुपमा गर्ने भनी भएको निर्णयलाई मंसिर १३ गते बसेको नगर कार्य पालिका बैठकबाट अनुमोदन गरिएको छ ।’ 

उहाँका अनुसार प्रथम राष्ट्रिय बाँस सम्मेलनको मुख्य आयोजक दिक्तेल रुपाकोट मझुवागढी नगरपालिका, वन अनुसन्धान तथा प्रशिक्षण केन्द्र बबरमहल, पर्यटन वन तथा बातावरण मन्त्रालय कोशी प्रदेश र ग्रिन व्याम्बो क्रियसन,ललितपुर रहनेछन् । 

“जहाँ बाँस त्यहाँ जीवन, जहाँ जीवन त्यहाँ बाँस’ भन्ने मूल नाराका साथ आयोजना हुन गैरहेको राष्ट्रिय बाँस सम्मेलनलाई भव्यतापूर्वक सफल बनाउन नगर कार्य पालिकाको बैठकबाट थप निर्णयहरु गरिएको जनाइएको छ । 

सम्मेलनका लागि आवश्यक तयारी गर्ने सम्बन्धमा पनि विभिन्न निर्णयहरु भएको नगरप्रमुख भट्टराईले बताउनुभयो । उहाँले नेपाल सरकारको ध्यानाकृष्ट गराउन राष्ट्रपति, प्रधानमन्त्री, प्रधानन्यायाधिश, सभामुख र राष्ट्रिय सभाका अध्यक्षलाई नगरपालिकाको तर्फबाट यहाँका दक्ष जनशक्तिद्धारा निर्मित १–१ थान बाँसको कुर्सी उपहार स्वरूप उपलब्ध गराउने निर्णय भएको समेत अबगत गराउनुभयो ।

राष्ट्रिय बाँस सम्मेलनको अवसरमा नगरपालिकाका सबैै वडामा बाँसबाट निर्मित पुराना सामग्रीहरू संकलन गरेर प्रदर्शनीमा राखिनेछन् । 

यस्तै नगरपालिकाभित्रका सबै वडाबाट बाँसमा काम गर्ने १५ जना विज्ञकर्मीहरू वडाले छनोट गर्ने र नगरपालिकाबाट प्रोत्साहित गर्ने, छनोट भएका व्यक्तिहरूबाट सम्मेलन अवधिमा बाँसबाट कलात्मक सामगी्रहरू तयार गर्न प्रोत्साहित गर्ने र ती सामाग्रीहरु पनि प्रदर्शनीमा राख्ने, सिको संरक्षण, व्यवस्थापन, दीगो उपयोग र उद्यमशिलता विकास गरी प्राकृतिक संरक्षण, स्थानीय रोजगारी तथा राष्ट्रिय अर्थतन्त्रमा वृद्धि गरी समृद्ध पालिका र राष्ट्र बनाउने यस सम्मेलनको मूल ध्येय रहेको जनाइएको छ ।

नगरपालिकाको जनप्रतिनिधिहरुले आफू निर्वाचित हुनासाथ बाँसवाट निर्मित कुर्सीमा बसेर, बाँसको फर्निचरहरू प्रयोग गरेर बाँसको प्रचार– प्रसार र महत्वलाई स्थापित गराउने प्रयत्न गरेका कारण दिक्तेल रुपाकोट मझुवागढी नगरपालिकामा पहिलो पटक ऐतिहासिक प्रथम राष्ट्रिय बाँस सम्मेलन गर्ने अवसर जुटाइएको नगरप्रमुख भट्टराईको कथन छ ।

नगरप्रमुख भट्टराईले सरकारी निकाय, बन–वातावरण–पर्यावरणका क्षेत्रमा काम गरिरहेका दातृ निकाय, गैर सरकारी संघ–संस्था, वन–विज्ञान शिक्षालय तथा निजी क्षेत्रहरू लगायत सबै सरोकारवाला पक्षहरूलाई प्रथम राष्ट्रिय बाँस सम्मेलनमा सहभागिता, साझेदारी, सहकार्य र समन्वयका लागि आह्वान गर्ने, यस नगरपालिकाबाट राष्ट्रिय आयोजक समितिसँग समन्वय तथा सहकार्य गरी स्थानीय स्तरमा सम्मेलनको आवश्यक तयारी गर्नका लागि नगरपालिकाका बन, वातावरण, फोहरमैला तथा विपद व्यवस्थापन समितिका संयोजक मुगाधन राईको संयोजकत्वमा समिति गठन गर्ने, बाँस सम्मेलनको पूर्वतयारी र स्थानीय समुदायलाई जोड्न विद्यार्थी मार्फत् बाँस सम्बन्धि निबन्ध प्रतियोगिता, हस्तकला प्रतियोगिता तथा प्रदर्शनी नगर स्तरीय गतिविधि तत्कालै गर्न प्रबन्ध मिलाइने पनि बताउनुभयो ।

पत्रकार भेटघाटकै क्रममा नगरप्रमुख भट्टराईले जिल्लाको उत्तरी भेकको लेकाली जंगलहरुमा पाइने रेडपाण्डा तया थार प्रजातिको वन्य जन्तु संरक्षणमा जनचेतना जगाउन विशेष महोत्सव गरिने पनि बताउनुभयो । सन् २०२५ लाई मुन्दुम ट्रेल भ्रमण वर्षको रूपमा मनाउने र करिव १ लाख मानिसलाई भ्रमण गराउने उद्देश्य रहेको र सो अवसरमा सरोकारवाला विभिन्न स्थानीय तहहरूले भिन्न–भिन्न महोत्सव गर्ने तयारी भैरहेकोमा दिक्तेल रुपाकोट मझुवागढी नगरपालिकाको पाथेका, नेर्पा, चिउरीडांडामा लोपोन्मुख रेडपाण्डा र थार पाईने भएकोले भ्रमणवर्षमा पाल्नुहुने यात्रुहरूलाई आकर्षण गर्दै लोपोन्मुख रेड पाण्डा र थारलाई संरक्षण गर्ने उद्देश्यले मुन्दुम ट्रेल भ्रमण वर्ष २०२५ को अवसरमा नगरपालिकाद्धारा रेड पाण्डा तथा थार महोत्सव आयोजना गर्ने निर्णय भएको पनि नगरप्रमुख भट्टराईले बताउनुभयो । 

यसैगरी मंसिर १३ गते बसेको नगर कार्य पालिककाको बैठकद्धारा नगरपालिकाकोे पर्यावरणलाई स्वच्छ र सफा राख्न सिसाको बोतलमा आउने पेय पदार्थहरू आयात गर्ने व्यक्ति, पसल, कम्पनी वा डिलरलाई खाली सिसाहरूलाई स्वयं व्यक्ति, पसल, कम्पनी वा डिलरले नै व्यवस्थापन गर्नुपर्ने नीतिलाई कडाइका साथ पालना गराउने  निर्णय भएको पत्रकार भेटघाट कार्यक्रममा जानकारी गराइएको छ । 

नगरपालिकाको स्वीकृत नीति तथा कार्यक्रममा उल्लेख भएको, फोहरमैला व्यवस्थापन ऐन, २०६८ र फोहरमैला व्यवस्थापन नियमावली, २०७० मा समेत फोहरमैला उत्पादन गर्ने व्यक्ति, संस्था वा निकायले नै पृथकीकरण तथा व्यवस्थापन गर्ने दायित्व सम्बन्धित फोहरमैला उत्पादन गर्ने व्यक्ति, संस्था वा निकायको हुने उल्लेख भएको हुँदा यस विषयलाई कार्यान्वयन गर्नका लागि सरोकारवालाहरूसँग पटक–पटक छलफल र सरोकारवालाहरूलाई विगतमा पटकपटक पत्राचार गर्दा समेत कार्यान्वयन नगरेको देखिएकोले निर्णय भएकै मितिबाट लागूहुने गरी ३५ दिनभित्र सिसाको बोतलमा आउने पेय पदार्थहरू आयात गर्ने व्यक्ति, पसल, कम्पनी वा डिलरले स्वयं शिशाजन्य बोतलहरू व्यवस्थापन गर्नुपर्ने, नगरेमा सिसाजन्य बोतललाई नगरपालिकामा पूर्णरूपले प्रतिवन्ध गरिने निर्णय भएको समेत जानकारी गराइएको छ । 

पत्रकार भेटघाट कार्यक्रममार्फत नगरपालिकाको तर्फबाट नगरप्रमुख भट्टराईले नगरपालिकाको समृद्धिका लागि दीर्घकालीन रूपमा टेवा पु-याउने उल्लेखित निर्णयहरूको कार्यान्वयनमा जिल्ला स्थित राजनीतिक दल, जिल्ला तथा नगरका बुद्धिजिवी, विद्यार्थी, युवा, महिला, उद्योगी–व्यवसायी लगायत सरोकारवाला सम्पूर्ण विकासप्रेमी नागरिक साथै सञ्चारर्मी पत्रकारहरुको पूर्ण साथ, सहयोग र समर्थन को विश्वास र अपेक्षा गरिएकोे बताउनुभयो ।