हलेसीन्युजडेस्क, खोटाङ /

दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराई र वन, पर्यायवरण, जलवायु परिवर्तन तथा भूक्षय नियन्त्रण लगायतको क्षेत्रमा लामो समयदेखि नेपालमा काम गरिरहेको दातृसंस्थाहरुसँग आज प्रथम बाँस सम्मेलनका साथै नगरको उन्नयनका विषयमा गम्भिर छलफल भएको थाहा भएको छ । वन तथा वातावरण मन्त्री ऐनबहादुर शाही तथा मन्त्रालयका सचिव दीपक खरालको निर्देशन बमोजिम मन्त्रालयका प्रवक्ता तथा महाशाखा प्रमुख बद्री ढुंगानाको उपस्थितिमा ती संस्थाहरुसँग परिणाममुखी र सिर्जनात्मक छलफल भएको नगरप्रमुख भट्टराईले जानकारी गराउनुभयो ।

छलफल कार्यक्रममा पूर्वमन्त्री तथा प्रथम बाँस सम्मेलन मूल आयोजक समितिका संयोजक गणेश शाह,  बन अनुसन्धान तथा प्रशिक्षण केन्द्रका महानिर्देशक डा.राजेन्द्र केसी,  ग्रिन बेम्बोका निर्देशक प्रणव प्रधान , सचिवालयका रामहरी गिरी, सचिवालय सदस्य प्रदीप दंगाल  तथा वन, पर्यायवरण, जलवायु परिवर्तन र भूक्षय नियन्त्रण लगायतको क्षेत्रमा लामो समयदेखि काम गर्दै आइरहेका दातृ संस्थाहरुका प्रतिनिधिहरु सहभागी हुनुहुन्थ्यो ।

छलफलको शुरुमै वन तथा वातावरण मन्त्रालयका प्रवक्ता तथा महाशाखा प्रमुख ढुंगानाले दिक्तेल रुपाकोट मझुवागढी नगरपालिकाको अगुवाइमा हने प्रथम राष्ट्रिय बाँस सम्मेलनका बारेमा दातृ संस्थाहरुलाई औपचारिक जानकारी गराएर परस्परमा हातेमालो गरेर जानका लागि यो कार्यक्रमको आयोजना गरिएको बताउनुभयो ।

तत्पश्चात बाँस सम्मेलन आयोजक समितिका सचिवालय सदस्य प्रदीप दंगालले राष्ट्रिय बाँस सम्मेलनको अवधारणाका साथै उद्धेश्य र यसका कार्यक्रमको रुपरेखा सबैका लागि जानकारी गराउदै प्रस्तुत गर्नुभएको थियो ।

छलफलमा सबै दातृ निकायहरुबाट प्रथम राष्ट्रिय बाँस सम्मेलनलाई सफल बनाउन आर्थिक, प्राविधिक लगायतका सहयोग उपलव्ध गराउने प्रतिवद्धता व्यक्त भएको थियो ।

भौतिक पूर्वाधारमा सडक खन्न ठूला ठूला मेसिनको प्रयोगले गाउँपाखामा भूक्षयको जोखिम बढिरहेको तर्फ छलफलमा चर्चा पाएपछि बाँसको प्रवद्र्धन, संरक्षणका साथै बैज्ञानिक उपयोगमा राष्ट्रिय सम्मेलनले राष्ट्रकै ध्यानाकर्षण गराउने विषय छलफलमा उठेको थियो ।

बाँसको विस्तार र संरक्षणबाट पर्यावरणीय सन्तुलनका साथै जमिनको समेत सुरक्षामा सहयोग पुग्ने सबैको धारणा व्यक्त भएको थियो ।

उहाँहरुले सम्मेलनलाई सार्थक बनाउन अत्यधिक वाँसका विज्ञहरु, बाँसका अध्येयता अनुसन्धानकर्ताहरु र बाँसको सम्बन्धमा अनुभवी व्यक्तित्वहरुलाई सहभागी गराउन सुझाव दिएका थिए ।

छलफलका सहभागीहरुले दिक्तेल रुपाकोट मझुवागढी नगरपालिकाले नौलो र गर्नै पर्ने अभियान शुरु गरेको भन्दै यसलाई राष्ट्रिय अभियानका रुपमा लानुपर्ने धारणा व्यक्त गरेका थिए ।

नगरप्रमुख भट्टराईले आगामी फागुण १५, १६ र १७ गते दिक्तेल रुपाकोट मझुवागढी नगरपालिकामा आयोजना हुन लागिरहेको प्रथम राष्ट्रिय बाँस सम्मेलनलाई उपलव्धिमूलक र प्रभावकारी ढंगबाट सम्पन्न गराउन काठमाण्डौमा विभिन्न बाँसविज्ञ, सरोकारवाला सस्था, वन तथा वातावरण मन्त्रालय, कृषि मन्त्रालयका मन्त्री, सचिव लगायत मातहतका निकायहरुसँग समन्वय गर्दै चरणबद्ध छलफल गरिरहनु भएको थाहा भएको छ ।

[यो पनि--प्रथम राष्ट्रिय बाँस सम्मेलनको सम्बन्धमा काठमाण्डौँमा पत्रकार सम्मेलनको आयोजना ]