हलेसीन्युजडेस्क, खोटाङ /

खोटाङको दिक्तेल रुपाकोट मझुवागढी नगरपालिकामा आगामी फागुन १५, १६ र १७ गते आयोजना गरिन लागिएकोे प्रथम राष्ट्रिय बाँस सम्मेलनका बिषयमा आज दिक्तेल रुपाकोट मझुवागढी नगरपालिका–१३ वडा कार्यालय नुनथलामा स्थानीय जनप्रतिनिधि, स्थानियवासी,राजनितिक दलका प्रतिनिधिहरु, शिक्षक लगायत सम्पूर्ण सरोकारवालाहरुसँग नगरप्रमुख तीर्थराज भट्टराईले छलफल गर्नुभएको छ ।  छलफल कार्यक्रममा वडाध्यक्ष भगेश्वर राईले बाँसको काम गर्ने मुख्यथलो नुनथला रहेको  बताउनु हुँदै खेर गईरहेका बाँसलाई मानव जीवन उपयोगी बनाउने लक्ष्यका साथ नगरपालिकाले आयोजना गर्न लागेको प्रथम राष्ट्रिय बाँस सम्मेलन निकै उपलव्धिमूलक रहने विश्वास व्यक्त गर्नुभयो । 
 

यस्तै छलफलका क्रममा अर्का सहभागी स्थानीय जीतबहादुर तामाङले नगरपालिकाले संघ र प्रदेशलार्ई पछाडी पार्दै नेपालमै प्रथम राष्ट्रिय बाँस सम्मेलनको आयोजना गरेकोमा खुसी व्यक्त गर्नु हुँर्दै  नुनथला बाँसका सामाग्रीहरु बनाउने कामका लागि प्रख्यात रहेको  खुलासा गर्नुभयो ।

अर्का स्थानीय अमर राईले पुराना समयको सम्झना गर्नुहुँदै पिता पुर्खाहरुले बाँसको महत्व त्यहीवेला चाल पाएर यसको विरुवा सेरा साप्सुबाट ल्याएर रोप्नु भएको सुनाउनु भयो । उहाँले अगाडि भन्नुभयो—‘अहिले खोटाङको लागि बाँस सम्मेलन भएको थाहा पाउँदा औधि खुशी लागेको छ । बल्ल हाम्रो चेत खुल्दैछ । यो त हामी गाउँलेका लागि स्वार्णिम अवसर हो नि ।’

डालो नाङलो बिस्थापित हुँदै गैरहेछ अब कसरी पुनःस्थापित गराउँने सोच्ने बेला आएको उहाँले भन्नुभयो । बजार व्यवस्थापन भए पक्कै उत्पादन हुने तर बजारीकरण व्यवस्थापन नगरपालिकाले गर्दिनु पर्ने उहाँको कथन थियो । यस्तै स्थानीय शिक्षक हेमविक्रम राईले प्रथम राष्ट्रिय बाँस सम्मेलन हाम्रो नगरपालिकामा हुनु हामी सबैको गौरवको विषय हो, यसको उपयोगिता लिन सक्नुपर्छ भन्दै बाँस हाम्रो सम्पत्ति हो, बाँस प्रवर्द्धन र विस्तारका साथै यसलाई व्यवसायिक उध्योगको रुपमा विकास गर्नु पर्नेमा जोड दिनुभयो ।

अर्का शिक्षक मणि तामाङले नगरप्रमुख तीर्थराज भट्टराईद्धारा सबैलाई सहकार्यमा लिई राष्ट्रिय बाँस सम्मेलनको आयोजना गर्दै खोटाङमा नयाँ इतिहास रच्दै हुनुहुन्छ, हामी सबैको पूर्ण साथ सहयोग रहनेछ भन्नुभयो । उहाँले प्रदर्शनीमा राखिने बाँसका सामाग्रीहरुका बारेमा सर्वप्रथम वडाले छलफल गरेर तय गर्नुपर्छ भन्नुभयो । उक्त अवसरमा कितावसिं राईले बाँसबाट बनाउनुभएको आकर्षक डालोको पनि उहाँले स्मरण गर्नुभयो ।  

वरिष्ठ पत्रकार कृष्ण आचार्यले  आफू पनि यसपटक काठमाण्डौामा भएको छलफल र अन्तकृयात्मक कार्यक्रममा सहभागी हुने अवसर पाएको भन्नुहुँदै राष्ट्रिय स्तरमा यो सम्मेलन पहिलो भएको भनाई सबैको भनाई रहेको उहाँले सुनाउनुभयो । बाँस सम्मेलनका लागि दिक्तेल रुपाकोट मझुवागढी नगरपालिकालाई संघ र प्रदेश सरकारले पछ्याउनु परेको अन्तरकृयामा सहभागीहरुले बताइरहँदा आफू पनि नगरवासी हुनुका कारण गर्वानूभूति भएको उहाँको कथन थियो ।

यस्तै अर्का सामाजिक अभियन्ता सूर्यबहादुर राईले बाँस धार्मिक, साँस्कृतिक र पुरातात्विक महत्व बोकेको सृष्टिको उपज हो भन्नुहुँदै यो सम्मेलन पनि त्यही कारण ऐतिहासिक हुने बताउनुभयो । यो अवसरमा स्थानीयवासीले आफ्नो सिप, कौशल र मिहिनेत प्रदर्शन गर्न सक्नुपर्छ उहाँले भन्नुभयो ।

उक्त अवसरमा सम्मेलनको उद्देश्य बाँससम्बन्धि विविध सम्भावना, अवसर र चुनौतीहरूको खोजी गर्ने, बाँसको खेतीलाई सुधार र विस्तार गर्दै अन्य खेती हुन नसक्ने जग्गामा बाँसखेती विस्तार गर्ने, बाँसबाट प्राप्त हुने विविध वस्तु तथा सेवाहरूको प्रदर्शनी गर्ने र यसको सक्दो सदुपयोग गर्नु रहेको दिक्तेल नगरपालिकाका नगरप्रमुख भट्टराईले जानकारी गराउनुभयो ।

[यो पनि--   राष्ट्रिय बाँस सम्मेलनको तयारी स्वरुप दातृसंस्थाका प्रतिनिधिहरुसँग छलफल ]