हलेसीन्युजडेस्क, खोटाङ

खोप महिनाका रुपमा बैशाख १५ र ३१ गते नियमित खोप लगाउन छुटेका पाँच वर्ष मुनिका वाल वालिकाहरुलाई खोपका लागि आह्वान गरिएको छ । देशका कुनै पनि वालवालिकाहरु अकालमा मृत्युको शिकार बन्न नपरोस भनेर सरकारी स्वास्थ खोप केन्द्रहरु मार्फत पाँच वर्ष उमेरभित्रका वालवालिकाहरुलाई विभिन्न डोजका रोग प्रतिरोधात्मक खोपहरु दिलाइने गरिन्छ । 

खोटाङमा भने नियमित खोप लगाउन छुटेका वालवालिकाहरु अत्यन्त न्युन रहेको स्वास्थ्य कार्यालय खोटाङका प्रमुख पूण्यप्रसाद सिग्देल बताउनुहुन्छ । खोटाङका जम्मा २४० खोपकेन्द्रहरु मार्फत २ वर्षभित्रका वालवालिकाहरुलाई हरेक महिनाको १०, ११ , १२ गते  ७ पालिकाहरुमा र  २०,२१, २२ गते अन्य तीन पालिकाहरुमा नियमित दिइने विभिन्न प्रकारका खोपहरु दिदै आइरहेको हुँदा बैशाख १५ र ३१ गते आह्वान गरिएको मितिमा पाँचवर्ष मूनिका शून्य डोजका सरदर ३० देखि ४०  वालवालिकाहरु मात्र हुन सक्ने प्रमुख सिग्देलको भनाई छ ।

हरेक महिनाको १०, ११ र १२ गते दिक्तेलरुपाकोट मझुवागढी नगरपालिका, हलेसीतुवाचुङ नगरपालिका, ऐसेलुखर्क, रावावेशी, केपिलास, , साकेला र दिप्रुङचुइचुम्मा गाउँ पालिकाहरुमा नियमित खोप उपलव्ध गराइन्छ भने  महिनाको २०, २१, २२ गते खोटेहाङ, जन्तेढुङ्गा र वाराहापोखरी गाउँपालिकाहरुमा नियमित खोपहरु दिइने गरिएको स्वास्थ्य कार्यालयले जनाएको छ ।