हलेसीन्युजडेस्क, खोटाङ /

खोटाङ जिल्लाको सदरमुकाम दिक्तेलवजारमा अप्रेशन सहित निःशुल्क आँखा शिविर सञ्चालन हुने भएको छ । फेमली केयर हस्पिटल दिक्तेल तथा नव दृष्टि आँखा हस्पिटल इटहरी–४ सुनसरीको आयोजनामा मोतिबिन्दुको कारणले  आँखा नदेख्ने भएका विरामीहरुलार्ई पौष १२ गते देखि १४ गते ३ दिनसम्म  फेमली केयर हस्पिटल दिक्तेलमा अप्रेशन सहित निःशुल्क आँखा शिविर सञ्चालन हुने भएको हो ।

पौष १२, १३ र १४ गते ३ दिन बिहान १० बजे देखि दिउसो ३ बजे सम्म सञ्चालन हुने शिविरमा आँखा विशेषज्ञ डा. सुवास पोखरेलद्धारा अप्रेशन गरिने जनाइएको छ ।  

शिविरमा उपलव्ध हुने सेवाहरु आँखा अप्रेशन पश्चात कालो चस्मा र औषधि निःशुल्क  वितरण गरिने आयोजक नवदृष्टि आँखा हस्पिटलले बताएको छ । 

आँखा कमजोर भएकाहरुका लागि २० प्रतिशत सहुलियत छुटमा चस्मा वितरण गरिनेछ भने अप्रेशन गर्नुपर्ने बिरामीहरुलार्ई निःशुल्क ल्याप टेष्ट गरिने आयोजकले बताएकोछ । 

नवदृष्टि आँखा हस्पिटल इटरी–४ सुनसरीका नेत्र विशेषज्ञ डा. सुवास पोखरेलले आँखाको दृष्टि क्षमताका सम्बन्धमा स्पष्ट पार्दै भन्नुहुन्छ—‘दृष्टिको लागि आँखा भित्रको लेन्स पारदर्शी हुनु जरुरी छ । जसरी झ्यालको सिसा सफा हुँदा प्रकाश राम्रोसँग कोठामा आउँछ र सफा नहुँदा आउंँदैन, त्यसरी नै आँखाको लेन्स सफा नभएमा आँखाभित्र पर्ने प्रकाश कम हुन्छ र दृष्टि कम हुँदै जान्छ ।’

डा. पोखरेलका अनुसार साधारणतया मोतिविन्दुको समस्या जीवनको उत्तरार्द्धमा देखा पर्नथाल्छ । उहाँ भन्नुहुन्छ—‘उमेर बढ्दै जाँदा आँखाको लेन्स अपारदर्शी हुँदै जान्छ र धेरै नै असर भएपछि दृष्टि कम हुँदै जान्छ । यो एक प्रकारको उमेरसँग आउने परिर्वतन हो । जसरी उमेर बढेपछि छालामा चाउरी पर्ने, कपाल सेतो हुने हुन्छ, त्यसरी नै आँखामा पनि मोतिविन्दु बढ्न थाल्छ । 

मोतिविन्दु अन्धोपनको कारणमध्ये एक प्रमुख कारण हो, तर उपचार गर्न सकिने रोग पनि हो । खोटाङ जिल्लामा मोतिबिन्दुका कारण दृष्टिविहीन नागरिकहरुका लागि यो शिविर अत्यन्त महत्वपूर्ण हुने आयोजकको भनाई छ ।