हलेसीन्युजडेस्क, खोटाङ /

खोटाङको खोटेहाङ गाउँपालिका वडा नं. ७ स्थित पुराना गाउँमा एक्जनाको घर तथा बस्तुवाख्रा बाँधिएका कटेरामा आगलागी हुँदा लाखौँको क्षति पुगेको छ । खोटाङवजार पुराना गाउँका तुलसीराम चौलागाईको घर कटेरामा हिजो वेलुकी अन्दाजी ६ वजे आसपास आगलागी हुदा अन्न, सुनचाँदी गरगहना, लत्ता कपडा भाडाकुडा लगायत ४२ वटा खशी वाख्राहरु जलेर नष्ट भएको स्थानीय छिमेकी देवचन्द्र ढकालले बताउनुभयो ।

तुलसीराम छिमेकीहरुसँग साना सिँचाईका विषयमा छलफल गर्न सावाखोलामा झरेका थिए । घरमा उनकी पत्नि र सानो छोरा मात्र रहेको अवस्थामा साँझ परिसकेकको वेला घर तथा कटेरोमा आगलागी भएको छिमेकी ढकालले बताउनुभयो । आगलागीको खवर पाउनेसाथ पालिकाबाट दमकल पठाइएको भए पनि दमकल घटनास्थलमा पुग्दा आगलागीबाट धेरै क्षति पुगिसकेको थाहा भएको छ । दमकलको सहयोगमा आगो निभाइएको थियो । आधा जलेको अवस्थामा बाँधिएको भैसीलाई भने बचाइएको थियो । 

आगलागीका कारण तुलसीरामको २५ लाखभन्दा वढी क्षति भएको हुनसक्ने ढकाल बताउनुहुन्छ ।

आगलागीको अनुसन्धानका क्रममा स्थानीय एक युवालाई प्रहरीले नियन्त्रणमा लिई अनुसन्धान भैरहेको जनाइएको छ ।