हलेसीन्युजडेस्क, खोटाङ

मन्त्री सुदन किरातीले मुलुकमा भएका भ्रष्टाचारको अन्त गरी सुशासन कायम गर्नु सरकारको मुख्य उद्धेश्य रहेको बताउनुभएको छ । खोटाङको दिक्तेलवजारमा प्रेस सेन्टर नेपाल, खोटाङद्धारा आज आयोजित पत्रकार सम्मेलनमा उहाले यस्तो बताउनु भएको हो ।

मन्त्री  किरातीले संघीय लोकतान्त्रिक गणतन्त्रलाई बलियो बनाउन संघीय ऐन कानूनहरु छिटो भन्दा छिटो निर्माण गर्नुपर्ने बाध्यता रहेको उल्लेख गर्दै आजै संघीय संसदमा पेश हुने पनि बताउनुभयो । गठबन्धन सरकारको अझ पनि औचित्यता कायम रहेको बताउँदै उहाँले यस सम्बन्धमा हाल उठीरहेको केही सवालहरुका बारेमा भने निर्मम बनेर समिक्षा गर्नु जरुरी रहेकोमा जोड दिनुभयो । यसरी समिक्षा नगर्ने हो भने यसमा अरु विकृति बढ्न सक्ने तर्फ उहाँले औल्याउनुभयो । 

यसैगरी नेपालको सबैभन्दा ठूलो शत्रु नै गरिवी, बेरोजगारी, अशिक्षा, रोग  रहेको बताउदै उहाले यसका विरुद्धमा सरकार मात्र होइन सबैले साझा दुश्मन किटान गरी एकतावद्ध भएर लाग्नुपर्ने उहाँको भनाइ थियो । यसका लागि गठबन्धन मात्र होइन राष्ट्रिय सहमतिका साथ राष्ट्रिय सरकार बनाउन पनि तयार हुनुपर्ने उहाँले बताउनुभयो ।

मन्त्री किरातीले खोटाङको त्रिधार्मिकस्थल हलेसी, किराँत समुदायको उद्गमस्थल तुवाचुङ–जयाजुम, बराहपोखरी, जन्तेढुङ्गा, मझुवागढी लगायतका धार्मिक तथा ऐतिहासिकस्थलहरुको पर्यटन प्रवद्र्धनका लागि संस्कृति, पर्यटन तथा नागरिक उड्डयन मन्त्रालयबाट बजेट विनियोजन गरिएको जानकारी दिनुभएको छ । उहाँले जिल्लाको पर्यटन प्रवद्र्धनका लागि मन्त्रालयबाट विनियोजित बजेटलाई सही तरिकाले कार्यान्वयन गर्न सम्बन्धित निकायलाई निर्देशनसमेत दिनुभएको छ ।

मन्त्री किराती दिक्तेल रुपाकोट मझुवागढी नगरपालिका–२ सोल्मामा ‘सोल्मा स्पोर्टस् क्लब सोल्मा’द्धारा आयोजना गरिएको ‘अण्डर–२३ पुरुष फुटबल प्रतियोगिता’ समापन कार्यक्रमलाई सम्बोधन गर्न खोटाङ आउनुभएको हो ।