हलेसीन्युजडेस्क, खोटाङ /

खोटाङको दिक्तेल रुपाकोट मझुवागढी नगरपालिकाका सबै वडाहरुमा तोकिएको दैनिकी तालिका अनुसार स्वास्थ्य परिक्षण, अपांगता परिचयपत्र वितरण तथा आवश्यकता पहिचान शिविर सञ्चालन भैरहेको छ । प्रदेश सरकार, स्थानीय तह र करुणा फाउण्डेशन नेपालको संयुक्त लागत सहभागितामा राष्ट्रिय अपांग महासंघको प्राविधिक सहयोगबाट दिक्तेल रुपाकोट मझुवागढी नगरपालिकाका सबै वडाहरुमा अपांगता रोकथाम तथा पुनःस्थापना कार्यक्रम अन्तर्गत स्वास्थ्य परिक्षण, अपांगता परिचयपत्र वितरण तथा आवश्यकता पहिचान शिविर सञ्चालन भैरहेको हो ।

दिक्तेल रुपाकोट मझुवागढी नगरपालिका वडा नं. १० पाथेकामा शुरुको दिन बैशाख १३ गते शिविर सम्पन्न भएको छ । उक्त शिविरमा ७ जनालाई अपांगता परिचय पत्र वितरण, ३८ जनाको अपांगता स्वास्थ्य परिक्षण, १४३ जनाको आँखा जाँच, ९३ जनालाई चस्मा वितरण, १४३ जनालाई औषधि वितरण, २४ जनालाई फिजियोथेरापी गरिएको जनाइएको छ ।

यसैगरी सोही शिवरिमा १४ जनालाई ह्विल चेयर, ४ जनालाई क्यान लठ्ठी, २ जनालाई विशेष जुत्ता, १ जनालाई वाकर र १ जनालाई श्रवण यन्त्र उपलव्ध गराउन सिफारिस भएकोे नगरप्रमुखका स्वकीय सचिव चिरिन्जीवी खतिवडाले बताउनुभयो । उक्त शिविरबाट २८६ जना सेवाग्राहीले सेवा प्राप्त गरेको जनाइएको छ ।

यसैगरी  बैशाख १४ गते वडा नं. ११ खार्मीमा अपांगता रोकथाम तथा पुनस्थापना कार्यक्रम अन्तर्गत  दोश्रो शिविर सम्पन्न भएको जनाइएको छ ।

शिविरमा ४९ जनाको प्रारम्भिक स्वास्थ्य परिक्षण गरिएको थियो भने ८१ जनाको आँखाको जाँच, २४ जनाको कानको जाँच, १२ जनाको फिजियोथेरापी गरिएको जनाइएको छ । उक्त शिविरबाट ९ जनाले नयाँ अपांगता परिचय पत्र प्राप्त गरेका छन भने ५३ जनालाई चस्मा उपलव्ध गराइएको छ । त्यस्तै अन्य १ जनालाई ह्विल चेयर, ३ जनालाई सेतो छडी, ३ जनालाई छडी, २ जनालाई बिशेष जुत्ता र ५ जनालाई श्रवण यन्त्रका लागि सिफारिस गरिएको नगरप्रमुखको सचिवालयबाट जानकारी दिइएको छ । दोश्रो दिनको शिविरिमा ११९ जना सेवाग्राहीहरुले सेवा प्राप्त गरेको  थाहा भएको छ ।

शिविरमा जिल्ला अस्पतालका मेडिकल अधिकृत डा. पुस्कल राई, अरुणा फाउण्डेसनका फिजियोथेरापिष्ट डा. ईश्वर तिमिल्सना, अडियो टेक्नेशियन आशाराम चौधरी र बि अप्टम व्याचलर अफ अप्टोमेट्री सत्यजित सिन्हाको टोलिद्धारा सेवा दिइएको जनाइएको छ । 

आज बैशाख १५ गते वडा नं. १५ विजयखर्कमा शिविर सञ्चालन हुनेछ । यसैगरी बैशाख १६ मा वडा नं. १४ वुइपा, १७ गते वडा नं. १३ नुनथला, १८ गते वडा नं. ९ निर्मलिडाँडा, १९ गते वडा नं. ८ दोर्पा, २० गते वडा नं. ७ दोर्पा चिउरिडाँडा, २१ गते  वडा नं. ६ नेर्पा, २२ गते वडा नं. ४ खाल्ले, २३ गते वडा नं. ३ वाम्राङ, २४ गते वडा नं. ५ लफ्याङ, २५ गते वडा नं. २ दिक्तेल, २६ गते वडा नं.१२ जालपा र २७ गते वडा नं १ दिक्तेलमा शिविर सञ्चालन हुने तालिका सार्वजनिक गरिएको छ ।

[ यो पनि -जन्तेढुङ्गा गाउँपालिकाको वडा-वडामा अपांगता रोकथाम तथा पुनःस्थापना कार्यक्रम सञ्चालन }