हलेसीन्युजडेस्क, खोटाङ /

खोटाङ जिल्लामा गोरु काट्दै गरेको अवस्थामा प्रहरीबाट चार जना स्थानीयहरु प्रकाउ परेका छन् । जिल्लाको ऐसेलुखर्क गाउँपालिका–४ जलेश्वरी स्थित रमिते भन्ने ठाउँमा आर्ईतबार गोरु काटेर  भाग लाउदै गरेको अवस्थामा स्थानीय जलेश्वरीका २६ वर्षीय मोहन तामाङ, २८ वर्षीय हेमकुमार तामाङ, २६ वर्षीय दावा तामाङ र ३२ वर्षका खिमाया तामाङलाई प्रहरीले प्रक्राउ गरेको थाहा भएको छ ।  

प्रक्राउ परेकाहरुलाई ऐसेलुखर्क  प्रहरीको पहलमा जिल्ला प्रहरी कार्यालय खोटाङ ल्याएर थप अनुसन्धान गरिरहेको  जिल्ला प्रहरी कार्यालय खोटाङले जनाएको छ ।  घटनास्थलबाट एकजना भने फरार रहेको बुझिएको छ । उनको खोजी कार्य भइरहेको प्रहरीले बताएको छ ।

गाउँघरमा पालिएका पशुचौपाय गार्ईगोरु  काटेर खान नपार्ईने कानुनी  ब्यवस्था छ । यदि कसैले गार्ई गोरु काटेर खाएको, मारेको भन्ने ठहरियो भने प्रचलित कानून बमोजिम ३ बर्षसम्म कैदको सजाय हुन सक्ने ब्यवस्था रहेको  प्रहरी नायव उपरिक्षक मञ्जिल मुकारुङले बताउनुभयो । 

केही वर्षदेखि गाउँघरमा पालिएका पशुचौपाय जिल्लाबाट अवैध रुपमा उदयपुरको पहाडी ईलाका हुँदै तराई र भारत लैजाने गरेको पार्ईएको छ । गौहत्या तथा अवैध निकासी पैठारीलाई नेपालको कानुनले बर्जित गरेको भएपनि जिल्लाबाट पछिल्लो समयमा अत्यधिक रुपमा बाहिर तस्करी भईरहेको बताइन्छ ।

खोटाङका प्रमुख जिल्ला अधिकारी भोजराज खतिवडाले यस्ता विषयमा नियन्त्रण गर्नका लागि  स्थानीय सरकारको पनि सहयोग र समन्वय अपरिहार्य रहेको बताउनुभयो ।

तर आ–आफ्नो परम्परा सँस्कृति अनुसार गोरु काटेको घटनामा नागरिकहरुलाई दण्डित गर्न नहुने भन्दै स्थानीयहरुबाट प्रतिकृयाहरु आउने गरेको पाइन्छ ।