हलेसीन्युजडेस्क, खोटाङ/
‘यो रेडियो नेपाल हो । अब कृष्णा ताम्राकारबाट समाचार सुन्नुहोस ।’ श्रोताको कान कानमा गुञ्जिने यो आवाज जसले त्यो वेला देश विदेशमा घटिरहेका ताजा ताजा घटना-गतिविधिहरु जानकारी गराउदथ्यो । हो, देशमा सञ्चार माध्यमका रुपमा रेडियो नेपाल मात्र सुन्न सकिने ऊ वेला आवाजको दनियामा एउटा लिजेन्ड्री पर्सनका रुपमा मानिने  कृष्णा ताम्राकारको मधूर आवाज अब सदाका लागि बन्द भएको छ ।

उहाँका आफन्त नरोत्तम वैद्यका अनुसार ताम्राकारको ८६ वर्षको उमेरमा काठमाडौँको न्यूरो अस्पतालमा विहीवार करिब १० बजे निधन भएको हो । पछिल्लो समयमा कृष्णा ताम्राकार क्यान्सरबाट प्रभावित हुनुहुन्थ्यो । २०१८ साल जेठ २४ गते रेडियो नेपालमा आवद्ध उहाँले २०४९ सालमा रेडियो नेपाल छोड्नु भएको थियो ।

सुरुमा हिन्दी भाषामा समाचार पढ्न छनोट भए पनि पछि ताम्राकारले नेपाली भाषामा समाचार उत्पादन तथा वाचनका साथै कार्यक्रम पनि चलाउनु भएको थियो । चालिसको दशकमा अत्यन्त लोकपृय रसरङ्ग कार्यक्रम सहकर्मी पाण्डव सुनुवारका साथमा चलाएर श्रोताको मन मुटुमा रहन सफल हुनुभएके थियो ।

रेडियो नेपाल छोडेपछि पनि विभिन्न रेडियोमा काम गर्नु भएका उहाँ विशेष गरी नेपाली भाषामा शुद्ध उच्चारण गर्ने रेडियोकर्मीको परिचय बनाउनु भएको थियो ।

केही दिनअघि एक कार्यक्रममा सम्मानित भएपछि ताम्राकारले नेपाली भाषाको संरक्षणका लागि आफूले सकेजतिको योगदान दिएको अनुभव सुनाउनु भएको थियो ।
ताम्राकारले कोरोनाको समयमा प्रभावित र जोखिममा परेका नागरिकलाई सन्देश दिने शृङ्खला “कोरोना क्याप्सुल“ पनि सञ्चालन गर्नु भएको थियो ।

भौतिक रुपमा उहाँँ हामीवीच नरहनु भए पनि आवाजको दुनियामा सदा अमर हुनुहुन्छ , सदा अजर हुनुहुन्छ । यही भनाईका साथ सामुदायिक रेडियो हलेसी एफएम उहाँ प्रति भावपूर्ण श्रद्धाञ्जली अर्पण गर्दछ ।