हलेसीन्युजडेस्क, खोटाङ /

खोटाङको दिक्तेल रुपाकोट मझुवागढी नगरपालिका–१ हाटडाँडा जिरो प्वाइन्टदेखि हलेसी एफएम हुदै मझुवागढी कालिका भगवती मन्दिर जाने सडक स्तरोन्नतिका लागि ढलानको काम गरिने भएको छ । मंसिर २९ गते शनिबार नगरप्रमुख तीर्थराज भट्टरार्ईको अध्यक्षतामा भएको एक कार्यक्रममा प्रमुख अतिथि प्रतिनिधिसभा सदस्य सरस्वती वजिमयले  हाटडाँडा देविथान सडकको ढलान गर्ने कामको शिलान्यास गर्नुभएको नगर प्रबक्ता एवं वडा नम्बर ५ लफ्याङका वडाध्यक्ष दिनेशकुमार घिमिरेले हलेसी एफएफलाई जानकारी दिनुभएको छ ।

          कार्यक्रमका केही झलकहरु

[

ममता÷पिआर÷मोहन एण्ड व्याँसीगाउँ जेभी दिक्तेलले ठेक्का पारेको निर्माण कम्पनीले आगामी असार मसान्तसम्म सडक ढलान गर्नेगरी कार्यालयसँग सम्झौता गरेको बताइन्छ ।

वर्षादको समयमा उक्त कच्चि सडक हिलाम्मे भएर गाउँका स्थानीयवासी, मझुवागढी तथा देविथान जाने दर्शनार्थीका साथै सशस्त्र प्रहरीवल हलेसी गुल्मका सुरक्षाकर्मीहरुले अत्यधिक सास्ती भोग्ने गरेका छन् ।

हाटडाँडादेखि नै ढलान गरेर अप्ठेरो तथा वढी जोखिम भएको भागमा पहिलो चरणको ढलानको काम गरिने वडाध्यक्ष घिमिरे बताउनुहुन्छ ।

उहाँका अनुसार सघन शहरी विकास तथा भवन निर्माण आयोजना ओखलढुंगाको रु २ करोड ८७ लाख रुपैयाँमा ६ सय मिटर सडक ढलान तथा १ हजार घनमिटर ग्याविन वाल लगाइने गरी तयारी गरिएको छ ।  ५ मिटर चौडाई हुने गरी सडकको  ढलान गरिने जनाइएको छ । 

हलेसी एफएमसँगको छोटो कुराकानीमा नगरप्रमुख भट्टराईले नगरपालिकाभित्र सडक स्तरोन्नतिको कामलाई प्राथमिकता दिइने बताउदै भन्नुभयो—‘दिक्तेल सदरमुकामको वजारभित्रको ढलानकार्य अन्तिम चरणमा पुगेको छ । यथासम्भव यो आर्थिक वर्षमा बाँकी काम सम्पन्न गर्ने लक्ष्य राखिएको छ । हुर्लुङ जाल्पा जाने सडकमा केही सहजता आएको छ । दिक्तेल अस्पताल चौकदेखि मात्तिम जाने सडक स्तरोन्नतिका लागि पनि सम्बन्धित निकायमा जोड गरिएको छ । त्यस्तै वडा नं. ५ लफ्याङ मेघेचौरा हुँदै वडा नं. ४ खाल्ले डाँडाखर्कसम्म सडक स्तरोन्नति गर्न सक्दा आफैँ रिङरोड हुनसक्ने देखिन्छ, यस तर्फ नगरपालिकाले योजना बनाउनेछ ।’ आज शिलन्यास भएको ढलानको काम सम्पन्न भएपछि मझुवागढी तथा देविथान जान धेरै सहज हुने पनि उहाँले बताउनुभयो ।

नगरप्रमुख भट्टराईको अध्यक्षतामा भएको शिलन्यास कार्यक्रममा प्रमुख अतिथि प्रतिनिधिसभा सदस्य वजिमयका साथै वडा नं.१ का वडाध्यक्ष  नबराज राई, वडा नं. ५ का वडाध्यक्ष दिनेशकुमार घिमिरे, नगरपालिकाका कर्मचारीहरु, प्राविधिक टोली लगायत स्थानीयवासीहरुकोे उपस्थिति रहेको थियो ।