हलेसीन्युजडेस्क, खोटाङ /

विहीवारदेखि लगातार परेको वर्षादका कारण जनजीवन प्रभावित बनेको छ । यो वर्षा अशोज १३ गते आइतबारसम्म नै जारी रहने जल तथा मौसम विज्ञान विभाग, बाढी पूर्वानुमान महाशाखाले जनाएको छ । महाशाखाले बिहीबार साँझ बाढीसम्बन्धी विशेष बुलेटिन मार्फत ५६ जिल्लालाई उच्च जोखिमको सूचीमा राखिएको सूचना जारी गर्दै ती जिल्लाहरुका नागरिकहरुलार्ई उच्च सतर्कता अपनाउन समेत अनुरोध गरेको छ ।

अशोज १३ गतेसम्म मौसम बदली भई ठाउँठाउँमा भारी र उच्च भारी वर्षा हुने उल्लेख गर्दै महाशाखाले जल सतह बढ्न सक्ने नदीहरूको विवरण समेत सार्वजनिक गरेको छ ।

महाशाखाका अनुसार नारायणी, कन्काई, कमला, बाग्मती, राप्ती, बबई लगायतका नदीहरुमा आज र भोलि बाढीको जोखिम छ । पर्सि आइतवारसम्म नै ठूलो पानी पर्ने सम्भावना भएकाले अशोज ११ र १२ गते पहाडी र हिमाली क्षेत्रमा रात्रिबस नचलाउन सरकारले आग्रह गरेको छ ।

विपद् जोखिम न्यूनीकरण तथा व्यवस्थापन प्राधिकरणको कमाण्ड पोष्टको बैठकले आइतवारसम्म ५६ वटा जिल्लामा ठूलो पानी पर्ने भएकाले पहाडी र हिमाली जिल्लामा रात्रिबस नचलाउन आग्रह गरेको हो ।

रातको समयमा यात्रा गर्दा पहिरो तथा बाढीको आँकलन गर्न कठिन हुने भएकोले उच्च जोखिम रहेका हिमाली तथा पहाडी जिल्लाहरुमा बस नचलाउन भनिएको प्राधिकरणले जनाएको छ ।

यस्तै धान नकाट्न, काटिसकेको भए तत्काल थन्काउन, तराई तथा मधेश क्षेत्रमा अन्नपात घरको भुईतलामा नराख्न, पहिरोको जोखिम भएका स्थानमा र नदि किनाराका वस्तिमा उच्च सतर्कता अपनाउने, दाउरा निकाल्न तथा माछा मार्न नदी किनारमा नजान अत्यन्त जरुरी अवस्थामा बाहेक यात्रा नगर्न पनि सरकारले आग्रह गरेको छ ।