हलेसीन्युजडेस्क, खोटाङ /

ट्राफिक प्रहरी  कार्यालय खोटाङले पछिल्लो दुई महिनाको अवधिमा रु. १३ लाख बढी राजस्व संकलन गरेको छ । आर्थिक वर्ष २०८१ / ०८२ को २ महिना साउन र भाद्र महिनामा ट्राफिक नियमको उलंघन गर्ने जम्मा ९१७ सवारीसाधन माथि कारबाही गर्दा रु.१३ लाख १३ हजार राजस्व संकलन गरेकोे जिल्ला ट्राफिक प्रहरी कार्यालय खोटाङले जानकारी दिएको छ । 

कार्यालयको तथ्याङ्क अनुसार सबैभन्दा धेरै जिप÷कार कारबाहीमा परेका छन् । २ महिनामा ४६१ वटा जिप÷कार कारबाहीमा पर्दा रु ३ लाख ८३ हजार ५ सय राजश्व संकलन भएको छ । यस्तै मोटरसाइकल ३१३ वटा कारबाहीबाट रु २ लाख २९ हजार ५ सय, बस २१ वटा कारबाहीबाट रु १७ हजार ५ सय, ट्रिपर १४ वटा बाट रु ११ हजार, ट्याक्टर ७५ वटा बाट रु ५४ हजार, ट्रक ९२ वटा बाट रु ७१ हजार र अटो–टेम्पो १० वटा बाट रु.७६ हजार राजश्व संकलन भएको ट्राफिक प्रहरी  कार्यालय खोटाङका प्रहरी जवान उपेन्द्र कठायतले हलेसी एफ एमलार्ई जानकारी दिनुभएको छ । 

प्रहरी जवान कठायत भन्नुहुन्छ—‘सडक प्रयोगकर्तालाई ट्राफिक नियम, सवारी दुर्घटना, सवारी दुर्घटना रोकथाम तथा न्यूनिकरणका उपायहरु लगायतका विषयमा सचेतना प्रदान गर्दै आइएको छ ।’ 

ट्राफिक प्रहरीले सवारी साधनले गल्ती गरेको अवस्थामा जरिवाना मात्र गराउने नभएर सम्बन्धित पक्षलाई ट्राफिक सम्बन्धि ज्ञान र सचेतना प्रदान गर्दै आएको उहाँले बताउनुभयो । नागरिक सचेत भएपछि अटोमेटिक रुपमा सवारी दुर्घटनामा कमि आउने उहाँको कथन छ । यही उद्देश्यले विभिन्न सचेतना तथा जनचेतनामूलक कार्यक्रम पनि गर्दै आएको कठायतले बताउनुभयो ।

ट्राफिक प्रहरीले विभिन्न सचेतनाका कार्यक्रम बढाउँदै लगे पनि ट्राफिक नियम पालनाको अटेरीका कारण सडक दुर्घटना हुने र त्यसबाट सर्वसाधारण घाइते हुनुका साथै ज्यान समेत जाने गरेको जिल्ला प्रहरी कार्यालय खोटाङका प्रमुख प्रहरी नायव उपरिक्षक पुरुषोत्तम खड्काले बताउनुभयो ।

[यो पनि-खोटाङमा सवारी कारवाहीबाट रु. ४९ लाख वढी राजस्व संकलन ]