हलेसीन्युजडेस्क, खोटाङ /

खोटाङको जन्तेढुङगा गाउँपालिका वडा नम्बर–३ काहुलेस्थित एक घरमा आगलागी हुँदा जलेर पूर्ण क्षति पुगेको समाचार प्राप्त भएको छ । वडा नं.३ काहुलेका शिवजी राईको काठको खम्वा लगाइएको ढुंगामाटोको गारो तथा खरको छानो भएको दुइ तले घरमा आज पौष २ गते अपरान्ह करिव ३.४५ बजे आगलागी हुँदा घरमा भएका अन्नपात, लत्ता कपडा, भाँडाकुँडा लगायत नगद रकम र अन्य  सामाग्रीहरु जलेर नष्ट भएको जिल्ला प्रहरी कार्यालय खोटाङका सूचना अधिकारी मोहन पोखरेलले हलेसी एफएमलार्ई जानकारी दिनुभएको छ ।  

आगलागीका कारण घरसँगै त्यहाँभित्र राखिएका लत्ताकपडा अन्दाजी रु ५० हजार बरावर, भाँडावर्तन अन्दाजी रु ३० हजार वरावर, धानमकै कोदा अन्दाजी रु. २० हजार बरावर, सोलार प्यानल अन्दाजी अन्दाजी ४० हजार वरावर, चाँदी १० तोला र नगद २० हजार रुपैयाँ जलेर क्षति पुगेको प्रहरी श्रोतले जनाएको छ । राईको परिवार बस्दै आएको घर समेत जलेर पूर्ण नष्ट हुँदा जम्मा रु ४ लाख बराबर क्षति भएको प्रहरी श्रोतबाट खुलेको छ ।

घटनाको जानकारी प्राप्त हुनेसाथ इलाका प्रहरी कार्यालय चिसापानीबाट प्रहरी टोली घटनास्थलमा पुगेर घर पूर्ण रुपमा जलिसकेको अवस्थामा स्थानीयवासी लगायत अन्य जनप्रतिनिधिहरुले आगो निभाउन सकेका थिए । आगलागीबाट पशु चौपाया तथा मानवीय क्षति भने नभएको थाहा भएको छ ।

आगलागी के कारणले भयो भन्ने अनुसन्धान भैरहेको प्रहरीले बताएको छ ।