स्थानीय सरकारलाई बुझायो १८ बुँदे शिक्षा सुधार सम्बन्धि ज्ञापनपत्र
 

हलेसीन्युजडेस्क, खोटाङ

नेपाल विध्यार्थी संघले आफ्नो ५५ औ स्थापना दिवसको अवसरमा देशका ७५३ वटै स्थानीय सरकारहरुलाई शैक्षिक सुधारको माग गर्दै ज्ञापन पत्र बुझाएको छ । नेपाल विध्यार्थी संघले शिक्षण सिकाइ सुधार गर्न शैक्षिक अवस्थाको अनुगमन, अध्ययन, अनुसन्धान गर्नुपर्ने, शिक्षामा बजेट बढाउनुपर्ने लगायतको माग राखेर बैशाख ६ गते आफ्नो ५५ औँ स्थापना दिवसको अवसर पारेर स्थानीय तहअन्तर्गत स्थानीय सरकार समक्ष ज्ञापन पत्र बुझाएको हो ।

खोटाङमा पनि सबै स्थानीय तहहरुमा प्रतिनिधि मार्फत ज्ञापनपत्र बुझाइएको थाहा भएको छ । नेवि संघ जिल्ला कार्य समितिका सभापति मोतिचन्द्र राईको नेतृत्वमा ने वि संघका विध्यार्थीहरुको एक टोलि  दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईलाई भेटेर शिक्षा क्षेत्रमा सुधार गर्न १८ बुँदे ज्ञापन पत्र बुझाइएको नेवि संघ श्रोतले जनाएको छ ।

ज्ञापनपत्रमा नेपालको संविधानद्धारा प्रदत्त शिक्षा सम्बन्धि संवैधानिक हक र तत्सम्बन्धि बनेको ऐन नियमावली अनुसार माध्यामिक तहसम्मको  निःशुल्क शिक्षाका लागि  नगरपालिकाको ध्यानाकर्षण गराइएको छ ।  

विध्यालयहरुले विभिन्न शिर्षकमा विध्यार्थीहरुबाट शुल्क उठाउँदै आएकोमा ती शुल्कहरु हटाई पूर्णत  निःशुल्क गराइनुपर्ने ज्ञापन पत्रमा उल्लेख छ ।

आजै नेवि संघको स्थापना दिवसको अवसरमा ने वि संघ खोटाङले वीपी स्मृति भवन दिक्तेलमा चियापान तथा शुभकामना आदान प्रदान गरेको छ । 

नेविसंघका सभापति मोतिचन्द्र राईको अध्यक्षतामा भएको कार्यक्रममा नेपाली कांग्रेसका उपसभापति इवन राई, नेपाली कांग्रेस महासमिति सदस्यहरु भिषण राई, राकेश परियार, महाधिवेशन प्रतिनिधि डिल्लिकुमारी आचार्य, नेपाली कांग्रेस जिल्ला संगठन विभाग प्रमुख विष्णुराज राई, दिक्तेलरुपाकोट मझुवागढी नगरपालिकाका सभापति प्रकाशकुमार श्रेष्ठ,  नेपाल तरुण दल जिल्ला अध्यक्ष काजिमान राई लगायतको उपस्थिति रहेको थियो ।