हलेसीन्युजडेस्क, खोटाङ /

खोटाङको रावाबेसी गाउँपालिकालार्ई पूर्णखोप सुनिश्चित गाउँपालिका घोषणा गरिएको छ । स्वास्थ्य शाखा प्रमुख जीवनप्रसाद चौलागाइका अनुसार पूर्ण खोप-सुरक्षित भविष्य, पूर्णखोप पालिका सुनिश्चितता तथा दीगोपना गर्ने राष्ट्रिय पूर्ण खोप निर्देशिका बमोजिम रावाबेसी गाउँपालिका भित्रका १५ महिनादेखि ५९ महिना मुनिका सबै बालबालिकाले पूर्ण खोप लगाएको र ० देखि १५ महिना सम्मका बालबालिकाहरुले खोप लगाईराखेको सुनिश्चित भएसँगै पालिकालाई आर्थिक वर्ष २०८०/०८१ को लागि पूर्ण खोप सुनिश्चत पालिका घोषणा गरिएको हो ।

आज जेठ २० गते आईतवार  रावाबेसी गाउँपालिकाको केन्द्र हरमटारमा आयोजित कार्यक्रममा जिल्ला समन्वय समिति प्रमुख सनबहादुर राई,  रावाबेसी गाउँपालिका अध्यक्ष  फटिक कुमार श्रेष्ठ, जिल्ला स्वास्थ्य कार्यालय खोटाङका प्रमुख जीवन प्रसाद चौलागाई लगायत जनप्रतिनिधि, स्वास्थ्यकर्मी तथा अन्य उपस्थित नागरिकहरुले पूर्ण खोप सुनिश्चितता घोषणा प्रतिवद्धता पत्रमा हस्ताक्षर गरेसँगै औपचारिक रुपमा पालिकालाई पूर्ण खोप सुनिश्चित पालिका घोषणा गरिएको जनाइएको छ ।

पहिलो चरणमा पालिकाका सबै वडालाई पूर्ण खोप सुनिश्चितता घोषणा गरिएको र हाल सोही तथ्याङ्क र सूचकका आधारमा पूर्णखोप सुनिश्चितता गाउँपालिका घोषणा गरिएको हो । स्वास्थ्य शाखाले दिगोपना र पूर्ण खोप सुनिश्चितताका लागि हरेक वर्ष चैतमा नियमित खोपको घरभेट सर्वेक्षण गरी उमेर अनुसार खोप पाए÷नपाएको एकिन गरेर खोप लगाउन छुटेको पाइएमा वैशाख महिनामा खोप दिने प्रक्रियाअनुरुप खोप दिने व्यवस्था गरेसँगै सबै शर्तहरू पूरा गरेपछि गाउँपालिकालाई पूर्ण खोप सुनिश्चितता गाउँपालिका घोषणा गरिएको गाउँपालिका अध्यक्ष फटिककुमार श्रेष्ठले बताउनुभयो ।

कार्यक्रम गाउपालिका अध्यक्ष  फटिककुमार श्रेष्ठको सभापतित्व तथा जिल्ला सम्मन्वय समितिका प्रमुख सनबहादुर राईको प्रमुख आतिथ्यमा भएको थियो । कार्यक्रममा  विशेष अतिथि रावाबेसी गाउँपालिकाकी  उपाध्यक्ष कौशिला गुरुङ, का साथै अन्य अतिथिहरु जिल्ला समन्वय अधिकारी नारायणप्रसाद भट्टराई, रावाबेसी गाउपालिका प्रमुख प्रशासकीय अधिकृत सरोज रेग्मी, जिल्ला स्वास्थ्य कार्यालय प्रमुख जीवनप्रसाद चौलागाई, वडाका वडाध्यक्षहरु, स्वास्थ्यकर्मीहरु लगायत अन्य जनप्रतिनिधिहरुको उपस्थिति रहेका थियो ।

यस अगाडि जेष्ठ ४ गते साकेला गाउँपालिकाले पूर्णखोप सुनिश्चितता पालिका घोषणा गरिसकेको छ ।

 [ यो पनि-साकेला गाउँपालिका जिल्लाकै पहिलो ‘पूर्ण खोप सुनिश्चित पालिका’ घोषणा }