स्वामी बाबा महाराजबाट भक्तजनहरुलाई आशिवर्चन प्रदान 

हलेसीन्युजडेस्क, खोटाङ /

विश्वचर्चित स्वामी १००८ बाबा कालिदाश कृष्णानन्द महाराजले आज दिक्तेलवजारस्थित मझुवा कालिका भगवती मन्दिरको दर्शन गर्नुभयो । स्वामी कालिदाश कृष्णानन्द महाराजले आज चैत्र २ गते ओखलढुंगास्थित मोलङ गाउँपालिका ४ स्थित जलजलेश्वर मन्दिरको दर्शन गरी आफ्नो जन्मस्थल सानीटार गएर स्थानीयवासीहरुसँग भेटघाट गरी सोझै दिक्तेलस्थित मझुवाकालिका देविस्थान मन्दिर आइपुग्नु भएको थियो ।

ओखलढुंगाबाट स्वामी कालिदाश महाराज हलेसी आउने पूर्व जानकारी भएपनि आज अपरान्ह ३ वजे सोझै मझुवाकालिका देविस्थान परिसरमा आइपुग्नुभएको थियो । हेलिकप्टरबाट मझुवागढी छेउ हलेसी सशस्त्र गुल्मको प्रांगणमा अवतरण गरी त्यहाँबाट पैदलमार्ग भएर मझुवाकालिका देविस्थान परिसरमा आइपुग्नुहुँदा उहाँलई बाक्लो भक्तजनहरुले जयजयकारका साथ स्वागत गरेका थिए । स्वामी कालिबाबाले सर्वप्रथम मझुवा कालिका देविस्थानको दर्शन तथा पुजा आजा गरेपछि नजिकैको चौरमा उहाँको आशिर्वचन कार्यक्रमको आयोजना गरिएको थियो । मझुवा कालिका देवि संरक्षण तथा विकास समितिका अध्यक्ष पदम प्रसाद आचार्यको सभापतित्वमा भएको स्वामी आशिर्वचन कार्यक्रममा दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईद्धारा स्वागत तथा नगरपालिकाका तर्फबाट अभिनन्दन गरिएको थियो । 

स्वागत तथा अभिनन्दनका क्रममा नगरप्रमुख तीर्थराज भट्टराईले खोटाङको धार्मिक तथा पर्यटन विकासका लागि स्वामी महाराज कालिदाशबाबाको यो भ्रमणले ठूलो टेवा पुग्ने विश्वास व्यक्त गर्नुभयो । सो अवसरमा स्वामी कालिदाश कृष्ण महाराजलाई बाँस सम्मेलनमा तयार पारिएका बाँसको घडि उपहार प्रदान गरिएको थियो । 

स्वामी महाराजलाई पूर्व जिल्ला समन्वय प्रमुख बबी चाम्लिङले पनि स्वागत मन्तव्य द्धारा स्वागत गर्नुभएको थियो । 
भक्तजनहरुलाई आशिर्वचन प्रदान गर्दै नेपालको महत्वपूर्ण तीर्थस्थलहरुमध्ये हलेसी महादेव, पाथीभरा जस्तै दिक्तेल मझुवाकालिका देवी पवित्र धार्मिक स्थल भएको उल्लेख गर्नुभयो । उहाँले कालिका पुराणमा कालिका मझुवाको वर्णन रहेको समेत बताउनुभयो । यो क्षेत्रमा आउँदा दुधकोशीमा स्नान गरीजल उठाएर हलेसी महादेवमा चढाउने, त्यही जल दिक्तेलस्थित मझुवा कालिका देवीमा पनि चढाएर दर्शन गर्दा सिद्धि प्राप्त हुने धार्मिक शन्देस प्रदान गर्नुभयो । हलेसी आएपछि कालिका देवीको दर्शन गर्नै पर्ने, त्यसो नगरे धार्मिक यात्रा अधुरो हुने बताउनुभयो । आफ्नो आशिर्वचनको क्रममा कालिका देवी र हलेसी मन्दिरका प्रवर्द्धन  र विकासका लागि आफ्नो तर्फबाट सधै सहयोग रहने समेत प्रतिवद्धता व्यक्त भयो । 

स्वामी कालिदाश महाराज दिक्तेल मझुवाकालि देवीको दर्शन पछि हलेसी महादेवको दर्शन गरेर ४५ मिनेट भक्तजनहरुसँग भेट घाट गरी आजै काठमाण्डौ फर्किनु भएको हलेसीतुवाचुङ नगरपालिकाका प्रवक्ता तथा वडा नं. ७ हलेसी का वडाध्यक्ष कमल गिरीले बताउनुभयो ।