हलेसीन्युजडेस्क, खोटाङ

खोटाङ जिल्लाको बाराहापोखरी गाउँपालिकाले आठजना कृषकहरुलाई अनुदानमा हाते ट्याक्टर वितरण गरेको छ । गाउँपालिकाले मंगलवार एक कार्यक्रमका वीच पालिकाभित्रका आठ कृषकहरुलाई पचास प्रतिशत अनुदानमा हातेट्याक्टर वितरण गरेको पालिका अध्यक्ष शालिकराम वञ्जाराले जानकारी दिनुभयो ।

नेपाल सरकार र पालिकाको कृषि  तथा पशुपञ्छि शिर्षकको सर्शत अनुदानबाट गाउपालिकाले मकैबाली पकेट, तरकारी बाली पकेट बिकास कार्यक्रम अन्तरगत ५० प्रतिशत अनुदानमा कृषकलाई हाते ट्याक्टर वितरण गरेको हो ।

कृषकहरुलार्ई सहज ढंगले  जोत्ने खन्ने काममा प्रयोग गर्न सघाउ पुर्याउने ध्येयले हाते ट्याक्टर उपलव्ध गराइएको पालिकाका कृषि शाखा प्रमुख द्रोणराज रेग्मी बताउनुहुन्छ । उहाँ थप्नुहुन्छ -‘ हाते ट्याक्टरले तरकारी खेतीका लागि माटो सारै राम्ररी फुकाएर जोत्छ । कृषि क्षेत्रलाई परम्परागत कृषि प्रणालीबाट बदलेर समय सुहाउँदो यन्त्रिकिकरण र व्यवसायिकरण नगरी उपाय छैन । कम मानव जनशक्तिले धेरै कषि कर्म गर्नका लागि आधुनिक कृषि औजारसँग किसानलाई जोड्ने गाउँपलिकाको उद्धेश्य रहेको छ ।’

गाउपालिकाले गत फागुन १४ गते हाते ट्याक्टरका लागि एक सुचना जारि गरेर कृषकहरुलाई निवेदनका लागि आह्वान गरेको थियो । सूचना अनुसार निवेदन दिने कृषक वा कृषक समूहका लागि गत जेष्ठ २३ गते अर्को सूचना जारी गर्दै कषि औजारका लागि लाग्ने रकम रु ७२ हजारमा प्राप्त हुने पचास प्रतिशत अनुदान कटाएर बाँकी रकम रु ३६ हजार तोकिएको खातामा जम्मा गरी जेष्ठ २८ गतेसम्म भौचर बुझाउन अनुरोध गरेको थियो । 

गाउँपालिकाले चालिस जना कृषकहरुलाई पचास प्रतिशत  अनुदानमा हातेट्याक्टर बितरण गर्ने लक्ष्य राखे पनि जम्मा आठ जना कृषकहरुले मात्र रकम जम्मा गरेको कारण उनीहरुले मात्र हाते ट्याक्टर प्राप्त गरेको पालिका श्रोतले जनाएको छ । यसरी पचास प्रतिशत अनुदानमा हातेट्याक्टर प्राप्त गर्नेहरुमा वडा नं. ४ फाक्टाङका दिलन राई, सिताराज राई, वमबहादुर राई, सुवासचन्द्र राई, पेशलमान श्रेष्ठ, टंकनारायण श्रेष्ठ हुनुहुन्छ  । त्यस्तै  वडा नं. २ सुन्तलेका कृष्ण वञ्जारा र  दलबहादुर दाहालले  पनि पचास प्रतिशत छुट अनुदानमा हातेट्याक्टर प्राप्त गरेका कृषि शाखा प्रमुख रेग्मीले जानकारी दिनुभयो ।

वितरण कार्यक्रममा बाराहापोखरी गाउपालिका अध्यक्ष शालिकराम बन्जारा, प्रमुख प्रशाकीय अधिकृत विकेन पौडेल, वडाध्यक्षहरु, स्थानीय जनप्रतिनिधि लगायत स्थानीय कृषकहरुको उपस्थिति रहेको थियो ।