हलेसीन्युजडेस्क, खोटाङ /

जिल्ला ट्राफिक प्रहरी कार्यालय खोटाङले यस आर्थिक बर्षमा ६ हजार ६ सय १ सवारी कारबाहीबाट रु. ४९ लाख भन्दा बढी राजस्व संकलन गरेको छ । जिल्ला ट्राफिक प्रहरी कार्यालय खोटाङले जनाए अनुसार सवारी ऐन विपरित सवारी चलाएवापत कारवाहीबाट चालु आर्थिक वर्ष २०८०/८१ को असार २५ गतेसम्म रु ४९ लाख २७ हजार राजस्व संकलन भएको हो ।

जिल्ला ट्राफिक कार्यालय खोटाङले मादक पदार्थ सेवन, ओभरलोड, सवारीसाधन चालक अनुमतिपत्र नभएका, ओभरस्पिड, ट्राफिक नियमको उल्लङ्घन गरेका सवारी साधनलाई दुर्घटना न्युनिकरणका लागि कारबाही गर्ने गरेको जिल्ला ट्राफिक प्रहरी कार्यलय खोटाङका प्रमुख प्रहरी सहायक निरिक्षक ज्ञानेन्द्र कार्कीले जानकारी दिनुभयो ।

उहाँका अनुसार दुर्घटना न्युनिकरणको लागि चालकहरुलाई जनचेतनामूलक कार्यक्रमको आवश्यकता रहेको र सरोकारवाला निकायहरुको सहकार्यमा समय समयमा चालकहरुलार्ई स्वास्थ्य परिक्षण  गरिएको छ । अहिले आफै दुर्घटना न्युनिकरणको लागि चालकहरुलाई जनचेतनामुलक प्रचारप्रसारमा खटिरहेको पनि  प्रहरी सहायक निरिक्षक कार्कीेले बताउनुभयो । जिल्ला ट्राफिक प्रहरी कार्यालयका अनुसार गत आर्थिक बर्षको तुलनामा यस आर्थिक बर्षमा दुर्घटना कम भएको जनाइएको छ ।

ट्राफिक सचेतनामूलक कार्यक्रम बढाउँदा दुर्घटना न्युनिकरण हुने प्रहरी सहायक निरिक्षक कार्की बताउनुहुन्छ । सवारी चालकलाई कारबाही गरिहाल्नुभन्दा फेरि पनि त्यस्ता काम नगर्नका लागि सुल्झाउने योजना बनाएको उहाँले सुनाउनुभयो । लामो दुरीका सवारी चालकलाई बीचमा विश्राम स्थानहरु बनाउने र त्यहाँ ट्राफिक नियमको विषयमा जानकारी गराउँदा दुर्घटना घट्न सक्ने उहाँको कथन छ । 

यस अघिको आर्थिक वर्ष २०७९/८० मा  ४ हजार ८ सय ६६ सवारी कारबाहीबाट रु ३४ लाख  ८६ हजार राजस्व संकलन भएको थियो ।  गत आर्थिक बर्ष भन्दा यो आर्थिक बर्षमा राजस्व वृद्धि भएको जिल्ला  ट्राफिक प्रहरी कार्यलय खोटाङको तथ्याङकमा उल्लेख गरिएको छ ।

[यो पनि-खोटाङमा सवारी कारबाहीबाट एकै महिनामा रु.५ लाख बढी राजस्व सङ्कलन ]