हलेसीन्युजडेस्क, खोटाङ /

खोटाङको रावाबेसी गाउँपालिका–२ खार्पामा ‘खार्पा महोत्सव तथा धार्मिक उत्सव–श्रीमद्भागवत सप्ताह ज्ञान महायज्ञ’ को आयोजना गरिने भएको छ । रस मर्मज्ञ युवा पण्डित आचार्य श्री लोमश शरण घिमिरे र पाठपारायाण युवापण्डित आचार्य श्री केशबप्रसाद भट्टरार्ईद्धारा संगितमय कथा प्रवचन गरिने उक्त महायज्ञ यही चैत्र २७ गते देखि २०८१ बैसाख ३ गतेसम्म रावावेशी गाउँपालिका–२ खार्पामा सञ्चालन गरिने आयोजक खार्पाली चेलीबेटी समूहलले जनाएको छ । 

खार्पामा जन्मी हुर्की विविध परिस्थितिका कारण हाल स्वदेश तथा विदेशमा रहेर पनि आफ्नो जन्मभूमिलाई माया गर्नुहुने र खार्पा पुग्न नसकेकाहरुलाई समेत यो महोत्सवले खार्पा घुम्ने, आन्तरिक पर्यटनको अवलोकन गर्ने र खार्पालाई नजिकैबाट अनुभूत गर्ने  अवसर  प्रदान गर्ने रावाबेसी गाउँपालिका २ खार्पाका शेखर पोखरेल बताउनुहुन्छ । उहाँ  खार्पा महोत्सव तथा श्रीमद्भागवत सप्ताह ज्ञान महायज्ञ, प्रचार प्रसार समितिका सदस्य हुनुहुन्छ । 

खार्पाका अग्रज साहित्यकार तथा समाजसेवी बलराम पोखरेलका अनुसार चैत्र २७ गते विहान ८ वजे कलस शोभा यात्रा, मण्डप पूजन तथा श्रीमद्भागवत शुभारम्भ गरिनेछ । त्यसपछि  हरेक दिन नित्य पूजा अर्चना दैनिक पाठपारायण तथा संगीतमय प्रवचन, नृत्य झाँकी प्रदर्शनका साथमा विविध कार्यक्रमहरु आयोजना गरिनेछन् ।

२०८१ बैसाख १ गते नित्य कार्यक्रमका साथ नन्द महोत्सव, दही चोरी लिला प्रदर्शन गरिनेछ । बैशाख २ गते नित्य कर्मका साथ कृष्ण रुक्मिणी शुभ विवाह, लक्ष्य वर्तिका प्रज्वलन आदी गरिनेछ । र, अन्तिम दिन सुदामा चरित्र, सारांश कथा प्रवचन तिलक प्रसाद ग्रहणका साथ कार्यक्रम समापन गरिने समाजसेवी पोखरेल बताउनुहुन्छ । 

यस पूण्य कार्यलाई भव्य र सभ्य बनाई पूर्ण सफल गराउन आ–आफ्नो दिवंगत पितृजनहरुको मोक्ष प्राप्तिका लागि जहाँबाट जे जति सम्भव हुन्छ सहयोग गर्न पनि आयोजक खार्पाली चेलीबेटी समूहले आग्रह गरेको छ । साथै सामूहिक ब्रतबन्ध गराउन इच्छुक महानुभावहरुले चैत्र २४, २५ र २६ गते भित्र आयोजकलाई नाम र संख्या सूचित गराउन पनि अनुरोध गरिएको छ । यो पूण्य कार्य यस महोत्सवका रुपमा यो ठाउँमा पहिलो चोटि गर्न लागिएको पनि आयोजकले जनाएको छ । 

यस्ता महोत्सव तथा धार्मिक अनुष्ठानले देश तथा विदेशका विभिन्न भूभागमा रहेका वासिन्दाहरुलाई भावनात्मक एकतामा गाँस्न सहयोग पुग्ने र आफ्नो जन्मभूमिका प्रति केही गरौँ भन्ने भावना जागृत हुने खार्पाका अग्रज एवं पूर्व प्रशासक सिताराम पोखरेल बताउनुहुन्छ । उहाँ यो महोत्सवबाट खार्पा मात्र होइन रावावेशी गाउँपालिकाको धार्मिक पर्यटनको क्षेत्रमा समेत केही टेवा पुग्ने विश्वास गर्नुहुन्छ ।

कार्यक्रम रावाबेसी गाउँपालिका–२ खार्पास्थित शारदा मा.वि.को प्राङ्गणमा सम्पन्न गरिने जनाइएको छ ।