हलेसीन्युजडेस्क, खोटाङ /

गजलकार कृष्ण काश्यपको गजल संग्रह ‘शराब’ माथि विमर्श तथा गजल वाचन कार्यक्रमको आयोजना गरिएको छ । क्यानभास साहित्य समाजको आयोजना तथा सङ्गीत साधना प्रतिष्ठान नेपालको सहकार्यमा शनिबार कार्यक्रम आयोजना गरिएको सुनसरीबाट सहकर्मी विवेक रेग्मीले हलेसी एफएमलाई जानकारी गराउनुभएको छ ।

            कार्यक्रमका केही झलक

कार्यक्रममा काश्यपको गजल सङ्ग्रह ‘सराब’माथि गजलकार तथा कवि टीका आत्रेय र सुरेश सुवेदीले टिप्पणी राख्नुभएको थियो ।
आत्रेयले गजललाई शील्पमा ढाल्ने काम गरिनु सबल पक्ष रहेको बताउनुभयो । ‘विषय विविधताका दृष्टिकोणमा कलात्मक गजल छन्,’ आत्रेयले भन्नुभयो, ‘गजल लेख्दा पनि अनुभूति हुनुपर्दोरहेछ । यो संग्रहमा पनि अनुभूतिसहित लेखिएको छ ।’

अर्का वक्ता सुवेदीले गजल सिद्धान्तभित्र रहेर लेखिनुपर्ने भएकाले पनि यसमा थुप्रै विवाद रहेको बताउनुभयो । ‘ती विवादतिर नजाऔँ, तर हामी क्रमशः सुधारिनुपर्छ,’ उहाँले थप्नुभयो, ‘गजल संरचनाको विधा चैँ हो ।’ उहाँले काश्यपका गजल संग्रहभित्र लयात्मक गजल रहेको उल्लेख गर्नुभयो ।

‘हामी बच्चादेखि नै लयसँग खेल्दै आएका हौँ । हामीलाई आमाले सुत् भन्नुभएन, गीत गाएरै सुताउनुभयो,’ सुवेदीले भन्नुभयो, ‘खाना खाँदा होस् वा फकाउँदा आमाले लयमै गीत गाउनुभयो । हामी सङ्गीतमा खाना खाएर आएका हौँ, त्यसैले अवचेतन मनमा कहीँ न कहीँ लय आउँछ ।’

गजलकार काश्यपले भने आफ्नो उक्त पुस्तक दोस्रो कृति रहेकाले जुनसुकै प्रतिक्रिया पनि स्वीकार्य रहेको बताउनुभयो । आफ्नो लागि ध्यान गर्नु र गजल लेख्नु उस्तै रहेको उहाँको कथन थियो ।

काश्यपले भन्नुभयो, ‘विगतमा हामीले वैचारिक आन्दोलन नै जस्तो गरेर आएका हौँ । गजल किन र के का लागि लेखेँ भन्दा पनि महत्वपूर्ण कुरा त गजल लेख्नु नै मेरो लागि उपलब्धि हो ।’

कवि बद्री भिखारीको सभाध्यक्षमा भएको कार्यक्रमको दोस्रो चरणमा गजल वाचन राखिएको थियो । गजलकारद्धय राज भट्टराई र बबिता भुजेलले चार–चार वटा गजल वाचन गर्नुभयो । सुनसरीको इनरुवा निवासी भट्टराई र खोटाङ घर भई मोरङको बूढीगंगा बस्दै आउनुभएकी भुजेलले गजल वाचन गर्नुभएको हो ।

कार्यक्रममा वक्ता र गजलकारहरूलाई कवि भिखारीसहित देवान किराती, सुदीप पाख्रिन र सुविद गुरागाईँले मायाको चिनो प्रदान गर्नुभएको थियो ।

सुमन रेग्मीद्धारा स्वागत मंतव्य राखिएको कार्यक्रममा कोशी प्रदेशका विभिन्न जिल्लासहित मधेस प्रदेशका सर्लाही र बागमती प्रदेशको चितवनबाट समेत स्रष्टाहरू सहभागी भएको हाम्रा सहकर्मी विवेक रेग्मीले बताउनुभयो ।

क्यानभास साहित्य समाजले १० वर्षयता विभिन्न साहित्यिक गतिविधि सञ्चालन गर्दै आएको सचिव विवेक विवश रेग्मीलाई उद्धृत गर्दै रेग्मीले जनाउनुभयो ।