हलेसीन्युजडेस्क, खोटाङ /

खोटाङका केही युवाहरुले नेपालीहरुको महत्वपूर्ण पर्व दशैँको अवसरमा एउटा घतलाग्दो मानव सहयोगको उदाहरण पेश गरेकाछन् । सम्झिदा सामान्य लाग्ने तर समस्यामा पिरोलिएकाहरुका लागि जीवनमा विर्सिनसक्नु गुण मानिने यो सहयोग आउने अप्ठेरा दिनहरुमा समेत दोहाराउने ती युवाहरुको भनाई छ । 

दशैँको अवसरमा नरनाता आफन्तकोमा जान यातायातको साधान नपाएर अप्ठ्यारोमा परेकाहरुका लागि उनीहरुले आफ्नै मोटरवाइकबाट नरनाता, आफन्तकोमा आउन जान सहयोग पुराएका हुन् । दिक्तेलवजारबाट ३० किलोमिटर आसपास माइति, ससुराली, मावली लगायत नरनाता आफन्तकोमा आउन जानका लागि खेलकुदकर्मी र सामाजिक अभियन्ता सन्जयकुमार राई, मोतिचन्द्र राई, स्थानीय युवाहरु नानीराम शाही, सुमन राई, कृतमान राईले अशोज २६, २७ र २८ गते तीन दिनसम्म मानवीय सहयोगका रुपमा निःशुल्क आवागमनको सुविधा पुराएको खेलकुदकर्मी मोतिचन्द्र राईले बताउनुभयो ।

उहाँका अनुसार चाँडपर्वको अवसरमा सवारीका साधानहरुमा यात्रुहरुको चाप वढ्ने हुन्छ, सबैको निजी सवारी साधान नहुन सक्छ, यस्तो अवस्थामा नातानालाकोमा नगई नुहने तर जान आउन समस्यामा परेकाहरुलाई ध्यानमा राखी यो अभियान सञ्चालन गरिएको हो । जेष्ठ नागरिक, महिला तथा वालवालिकाहरुलाई वढी ध्यानमा राखि सेवा उपलव्ध गराइएको उहाँको भनाई छ । टिकाको दिनदेखि सुरु गरी तीन दिनसम्म करिव ५५/६० व्यक्तिहरुलाई आउन जान सहयोग पुगेको जनाइएको छ ।

दिक्तेलदेखि दिप्रुङ, नेर्पा, खार्मी, बुइपा, हलेसी, बाम्राङ लगायत आसपासका ठाउँहरुसम्म उहाँहरुले आउन/जान आ-आफ्ना मोटरवाइकको प्रयोग गरी निःशुल्क सहयोग पुराउनुभएको थियो ।

हलेसीतुवाचुङ नगरपालिका वडा नं. ११ राजापानीकी ज्ञानु वुढाथोकी नेर्पा माइतीघरमा टिका थाप्नका लागि उहाहरुकै सहयोगले सजिलै पुग्न सकेको बताउनुहुन्छ ।

यात्राको क्रममा सहयोग पाउनेहरुले कृतज्ञी आँखाले धन्यवाद दिँदा दशैँमा आशिर्वाद थाप्दा पाएको सन्तुष्टिभन्दा अझ वढी आत्मसन्तोष मिलेको अभियानमा सरिक युवाहरुले बताउनुभयो । यसबाट नजिकिदै गरेको दोश्रो महत्वपूर्ण पर्व तिहारमा पनि यातायातको अभावमा माइतिचेलीको भेट हुन सम्भव नभैरहेको अवस्थामा सहयोग पुराउने सोँचमा पुगेको उहाँहरु बताउनुहुन्छ ।