हलेसीन्युजडेस्क, खोटाङ /

खोटाङको दिक्तेलरुपाकोट मझुवागढी नगरपालिकामा शुभसेर राई स्मृति प्रतिष्ठानले स्वर्गीय शुभसेर राईको दोश्रो वार्षिक पूण्य तिथिको अवसर पारेर शैक्षिक क्षेत्रमा योगदान पुराएका विभिन्न व्यक्तिहरुलाई सम्मान गरेको छ । खोटाङको सदरमुकाम दिक्तेलवजारस्थित जिल्ला समन्वय समितिको सभाहलमा प्रतिष्ठानले स्वर्गीय राईको पूण्य तिथिको अवसरमा आज एक समारोहका वीच शिक्षा क्षेत्रमा योगदान पुराउनुभएका सात प्रतिष्ठित व्यक्तिहरुलाई सम्मान गरेको हो ।

प्रतिष्ठानका अध्यक्ष देवविक्रम राईको अध्यक्षता तथा संविधान सभा सदस्य एवं प्रदेश सभाका सांसद पाँचकर्ण राईको प्रमुख आतिथ्यतामा सम्पन्न कार्यक्रममा शिक्षासेवी केशवराज कार्की, जयप्रसाद आचार्य तथा देवीप्रसाद आचार्यलाई शुभसेर राई खोटाङ जिल्ला शिक्षक नेतृत्व सम्मानद्धारा सम्मान गरिएको छ ।

त्यसैगरी शुभसेर राई खोटाङ जिल्ला उत्कृष्ट शिक्षक पुरस्कार नगद रु ५५ हजार ५ सय ५५ द्धारा हलेसीतुवाचुङ नगरपालिका वडा नं. १० अर्खौलेस्थित सरस्वती माविका शिक्षक डिगवीर राईलाई पुरस्कृत गरिएको प्रतिष्ठानले जनाएको छ ।

कार्यक्रममा जन्तेढुङ्गा गाउँपलिकास्थित चिसापानी मा वि का प्रअ रामबहादुर राउत शुभसेर राई खोटाङ जिल्ला उत्कृष्ट प्रधानाध्यापक सम्मानद्धारा सम्मानित हुनुभएको छ भने शुभसेर राई खोटाङ जिल्ला शिक्षक दीर्घ सेवा सम्मानद्धारा दिप्रङचुइचुम्मा गाउँपालिका वडा नं. ३ सापातेलस्थित मिनाकर्ण माविका शिक्षक  नानीवावु बस्नेत सम्मानित हुनुभएको जनाइएको छ ।

यसैगरी शुभसेर राई खोटाङ जिल्ला उत्कृष्ट विध्यालय व्यवस्थापन समिति अध्यक्ष सम्मान द्धारा साकेला गाउँपलिका वडा नं. ३ खिदिमास्थित सिद्धेश्वरी माविका अध्यक्ष मिन कुमार राई सम्मानित हुनु भएको छ । 

२०७९ भाद्र ५ मा स्थापना भएको प्रतिष्ठानको खातामा शुरुमा जम्मा भएको अक्षय कोष रु. ११,११,१११ बाट प्राप्त हुने व्याजबाट सम्माान तथा पुरस्कार प्रदान गरिदै आएको स्वर्गीय शुभसेर राईका छोरा एवं प्रतिष्ठानका अध्यक्ष देवविक्रम राईले बताउनुभयो ।

विक्रम सम्वत २००७ साल भाद्र २५ गते वुइपामा जन्मिनुभएका स्वर्गीय राई लामो समयसम्म शिक्षण पेशामा योगदान दिदै शैक्षिक उत्थानका लागि समेत जीवभर समर्पित रहनुभएका एक कुशल शैक्षिक अभियन्ता हुनुहुन्थ्यो । उहाँको २०७८ साल भाद्र ५ गते निधन भए पछि  परिवार तथा आफन्तले उहाँको सम्झनामा शुभसेर राई स्मृति प्रतिष्ठानको स्थापना गर्नुभएको हो ।