हलेसीन्युजडेस्क, खोटाङ

खोटाङको दिक्तेलरुपाकोट मझुवागढी नगरपालिका–५ स्थित मझुवागढी कालिका देविस्थान परिसरमा पहिलोपटक पाइपको माध्यमबाट कलकल पानीको धारो बहन थालेको छ । समुन्द्री सतहबाट करिब १९ सय  मिटर उचाइमा अवस्थित मझुवागढी कालिका देविस्थान परिसरमा लामो प्रयत्न पछि दिखुवाखोलाको सिर वाताल मूहान बाट खानेपानीको पाइप विच्छ्याई  पानी उपलव्ध गराएसँगै पहिलोपटक आषाढ १६ गते शनिवार पाइपबाट कलकल पानीको धारो बहन शुरु भएको होे ।

मझुवागढी तथा कालिका भगवती देविस्थान आसपास पानीको अभावमा पुजाआजा तथा त्यहाँ पुग्ने भक्तजनहरुलाई समेत समस्या पर्दै आइरहेकोले त्यहाँ पानी उपलव्ध गराउने हेतुले आर्थिक वर्ष २०७२/७३ बाट शुरु भएको कालिका भगवती खानेपानी आयोजनाले अब भने मूर्तता पाएको मझुवा कालिका भगवती संरक्षण तथा विकास समितिका अध्यक्ष पदम प्रसाद आचार्य बताउनुहुन्छ । देविस्थान परिसरमा पानीको धारो बहन थाले पछि पहिलो पटक हातको अन्जुलीमा पानी थापी कालिका देविस्थानमा अर्पण गर्दा ठूलो आध्यात्मिक आनन्द प्राप्त भएको उहाँको कथन छ ।

मझुवा कालिका भगवती संरक्षण तथा विकास समितिका अध्यक्ष पदम प्रसाद आचार्य हातको अञ्जुलीबाट जल अर्पण गर्दै

यही खुशीमा आफ्नो सामाजिक सञ्जालमा खानेपानी आयोजनाको विगत प्रयासलाई सम्झदै उहाँले यस्तो स्टाटस लेख्नुभएको छ-‘‘३३० वर्ष अघिदेखि दैनिक पुजाआजा शुरु भएको कालिका भगवती मन्दिर, बुधेश्वर गुफा र ऐतिहासिक मझुवागढीमा पानीको ज्यादै समस्या थियो । यस शक्ति पिठ धार्मिक स्थल र ऐतिहासिक पर्यटकीय थलोमा पानी पुर्याउने परिकल्पना गरेर दिक्तेल खानेपानीका प्राविधिक मित्र युवराज थापासँग सहयोग लिई म आफैले फित्ता समाई भगवती स्थानदेखि रुपाकोट सम्मको नाप लिएर खानेपानी विभागबाट स्टिमेट गराई शहरी विकास मन्त्रालयबाट योजना स्विकृत गराएको थिएँ । पछि मुहानमा अवरोध भएको कारण रुपाकोटको सट्टा ठूलो मिहिनेतबाट वाताल मुहान बदलेर कामको थालनी भएको थियो । यस कार्यमा पूर्ण रुपमा सक्रिय भै काम सफल गराउन सहयोग गर्ने निर्माण समितिका संयोजक दुर्गाप्रसाद घिमिरे, दैनिक रेखदेखमा खट्नुहुने धनपति आचार्य लगायत निर्माण समितिका सबै मित्रहरु , पाइप गाड्न जग्गा दिनुहुने जग्गादाताहरु सबैलाई धन्यवाद । खानेपानी कार्यालयका प्राविधिक मित्र युवराज थापा लगायत सबै कर्मचारी साथीहरुलाई पनि हार्दिक धन्यवाद ।’’

निर्माण समितिका संयोजक दुर्गा प्रसाद घिमिरेका अनुसार धार्मिक परम्परा अनुसार मन्दिर परिसरमा ९ वटा धाराहरु रहनेछन् । त्यस्तै यही आयोजना अन्तर्गत दिक्तेलरुपाकोट मझुवागढी नगरपालिकाका  बाम्राङसिरानका वस्ति, निगाले, धामखोरी, मुढे थापागाउँ, लगायत आसपासका वासिन्दालाई समेत पानी उपलव्ध गराइनेछ ।

शरुमा प्रदेश अन्तर्गत शहरी विकास मन्त्रालयबाट वजेट स्विकृत गराई रु.२२ लाखबाट काम शुरु भएको  निर्माण समिति संयोजक घिमिरे बताउनुहुन्छ । उहाँले यसलाई पूर्ण रुपमा सम्पन्न गर्न आवश्यक वजेटको माग भैरहेको समेत बताउनुभयो ।