हलेसीन्युजडेस्क, खोटाङ /

जिल्ला प्रहरी कार्यालय खोटाङले उत्पादन गरी हलेसी एफएमबाट प्रशारण हुदै आइरहेको ‘समुदाय–प्रहरी साझेदारी’ कार्यक्रम अन्तर्गत नागरिकसँग प्रहरी रेडियो कार्यक्रम निरन्तरताका लागि आज पुनः तेश्रो चोटि सामुदायिक रेडियो हलेसी एफएम र जिल्ला प्रहरी कार्यालय खोटाङवीच सम्झौता नवीकरण भएको छ । 

कोशी प्रदेश प्रहरी बार्षिक कार्ययोजना-२०८० को रणनीतिक क्रियाकलाप ‘समुदाय–प्रहरी साझेदारी’ कार्यक्रम अन्तर्गत जिल्ला प्रहरी कार्यालय खोटाङका तर्फबाट कार्यालय प्रमुख प्रहरी नायव उपरिक्षक प्रतिक बिष्ट र सामुदायिक रेडियो हलेसी एफ.एम.खोटाङका तर्फबाट स्टेशन म्यानेजर सुनिल श्रेष्ठद्धारा कात्तिक १४ गते बुधवार जिल्लाको समग्र शान्ति सुव्यवस्थाको अवस्था, प्रहरी गतिविधि, जनचेतनामुलक सामाग्री सहित नागरिकलाई सुरक्षाको प्रत्याभुति दिलाउने उद्देश्य अनुरुप जिल्ला प्रहरी कार्यालयद्धारा उत्पादन गरिने रेडियो कार्यक्रम “नागरिकसँग प्रहरी” पाक्षिक रुपमा  सामुदायिक रेडियो हलेसी एफएम १०२.४ मेघाहर्जबाट प्रशारण गरिने सम्बन्धमा तेश्रो चरणका लागि सम्झौता पत्रमा हस्ताक्षर भएको हो ।

२०८० साल श्रावण १ गते जिल्ला प्रहरी कार्यालय खोटाङका तत्कालिन प्रहरी नायव उपरिक्षक मन्जिल मुकारुङको विशेष चासो र प्रयासमा ‘समुदाय–प्रहरी साझेदारी’ कार्यक्रम अन्तर्गत नागरिकसँग प्रहरी रेडियो कार्यक्रम प्रशारणका लागि जिल्ला प्रहरी कार्यालय खोटाङ पहिलो पक्ष र हलेसी एफएम दोश्रो पक्ष भएर प्रथम चरणमा सम्झौता भएको थियो ।

रेडियो कार्यक्रम ‘नागरिकसँग प्रहरी’को प्रभावकारिता र लोकपृयतालाई मध्यनजर गरी पुनः २०८० फाल्गुण ३ गते जिल्ला प्रहरी कार्यालय खोटाङका तात्कालिन प्रहरी नायव उपरिक्षक पुरुषोत्तम खड्का र हलेसी स्टेशन म्यानेजर सुनिल श्रेष्ठले दोश्रो चरणका लागि कार्यक्रमको निरन्तरता दिने सम्झौता पत्रमा हस्ताक्षर गरी उक्त कार्यक्रमलाई निरन्तरता दिइदैै आएको थियो ।  

तेश्रो चरणको सम्झौतापश्चात अब जिल्ला प्रहरी कार्यालय खोटाङबाट उत्पादित अपराध अनुसन्धान, नागरिक सचेतना लगायत समुदाय मैत्री प्रहरी गतिविधिसँग सम्बन्धित रेडियो कार्यक्रम–‘नागरिकसँग प्रहरी’–सामुदायिक रेडियो हलेसी एफएम १०२.४ मेघाहर्जबाट महिनाको हरेक १५ गते र १ गते विहान ८.०५ वजेदेखि ८.३० वजेसम्म नियमित प्रशारण गरिनेछ ।

[यो पनि--‘नागरिकसँग प्रहरी’ रडियो कार्यक्रम निरन्तरता सम्बन्धमा पुनः सम्झौता ]