(श्रोत-दिक्तेलरुपाकोट मझुवागढी नगरपालिका )
            नेपालको संविधानको धारा ३५ मा स्वास्थ्य सम्बन्धी मौलिक हकको रुपमा ब्यबस्था गरेको छ । जसमा प्रत्येक नागरिकलाई राज्यबाट आधारभूत स्वास्थ्य सेवा निःशुल्क प्राप्त गर्ने हक हुनेछ र कसैलाई पनि आकस्मिक स्वास्थ्य सेवाबाट वञ्चित गरिने छैन भन्ने ब्यबस्था रहेको छ । यसैगरी नागरिकलाई आधारभूत स्वास्थ्य सेवा निःशुल्क उपलब्ध गराउनु स्थानीय सरकारको दायित्व भित्र पर्दछ । स्वास्थ्यको दृष्टिकोणवाट अत्यन्तै दुर्गम मानिने यस जिल्लाबाट विशेषज्ञ सेवाको लागि महँगो खर्च गरेर बाहिर जानुपर्ने अवस्था रहिआएको छ । यस्तो अवस्थामा दिक्तेलरुपाकोट मझुवागढी नगरपालिकामा बिशेषज्ञ सहितको स्वास्थ्य शिविरको आयोजना गर्न सके यहाँका जनतालाई केही राहत मिल्ने कुरा नकार्न सकिँदैन ।
           यसै विषयलाई मध्येनजर गरेर दिक्तेलरुपाकोट मझुवागढी नगरपालिकाले काठमाण्डौं स्थित विभिन्न अस्पताल र विशेषज्ञ चिकित्सकको समन्वयमा स्वास्थ्य शिविरको आयोजना गर्दै आएको अवस्था छ । भरखरै सम्पन्न निःशुल्क आँखा शिविर मार्फत ११४०५ जनाले सेवा लिएका छन् । जसमा ७८ जनाको आँखाको शल्यकृया र ४०० जनालाई निःशुल्क चस्मा वितरण गरिएको थियो।
         हाल नेपालमा सरुवा रोगको तुलनामा नसर्ने रोगको दर बृद्धि भईरहेको पछिल्लो परिस्थितिमा मृर्गौलाको रोग पनि एक गम्भिर समस्याको रुपमा रहेको अवस्थालाई मध्यनजर गरि राष्ट्रिय मृर्गौला बचाऔँ अभियानको सहयोग तथा मृर्गौला उपचार केन्द्र काठमाण्डौसंँगको समन्वयमा दिक्तेलरुपाकोट मझुवागढी नगरपालिकाले निःशुल्क मृर्गौला परिक्षण शिविरको आयोजना गरेको हो । मृर्गौला परिक्षण शिविरमा यस नगरपालिका तथा जिल्ला भरिका करिव ३,००० सेवाग्राहीको मृर्गौलाको परिक्षण गर्ने लक्ष्य राखिएको छ । शिविर यही २०७९ फागुन २४ र २५ गते दिक्तेलरुपाकोट मझुवागढी नगरपालिकामा संचालन गरिने छ ।
         शिविरमा नेपालका वरिष्ठ मिर्गौला रोग विशेषज्ञ ऋषिकुमार काफ्लेबाट मिर्गौला बचाउने उपायको बारेमा खोटाङ जिल्लाका ७९ वटा वडाका स्वस्थ्य चौकीका प्रमुख तथा अन्य स्वास्थ्यकर्मीहरु, जनप्रतिनिधी, कर्मचारी, पत्रकार, शिक्षक तथा अन्य सरोकारवालाहरुलाई मिर्गौला बचाउने उपाय तथा स्वास्थ्य सम्वन्धि महत्वपूर्ण विषयमा प्रशिक्षण समेत सञ्चलन हुनेछ । डा. काफ्लेले दिने प्रशिक्षणबाट जिल्लामा बसेर काम गरिरहेका स्वस्थ्यकर्मिहरु स्वयं मिर्गौला जाँच गर्न सक्षम बन्नेछन्। 
           विश्व मिर्गौला दिवसको अवसरमा यस दिक्तेलरुपाकोट मझुवागढी नगरपालिकाको आयोजना, राष्ट्रिय मृर्गौला उपचार केन्द्रको प्रविधिक सहयोग र जिल्ला स्वास्थ्य कार्यालय खोटाङ, जिल्ला रेडक्रस सोसाइटी खोटाङ CCBH परियोजन तथा सरस्वती मध्यामिक विद्यालयको सहकार्यमा सञ्चालन हुने यो शिविरमा मृर्गौलाको परीक्षण गरी मिर्गौला बचाउने उपायबारे आम जनसमुदायमा शिक्षा प्रदान गरिनेछ ।
         साथै सामाजिक अभियन्ता हिम्मतसिंह लेकालीद्वारा गुणस्तरिय शिक्षा र स्वास्थ्य प्रवर्द्धनमा विश्वास अभियान सम्बन्धी,  डा। के के राईद्वारा जलवायु परिवर्तनको मानव स्वास्थ्यमा असर सम्बन्धी, राष्ट्रिय मानवअधिकार आयोग वाग्मती प्रदेश प्रशासन प्रमुख लोकनाथ घिमिरेद्वारा मानवअधिकार र स्वास्थ्य  सम्बन्धी प्रशिक्षण गरिनेछ ।
         दिक्तेलरुपाकोट मझुवागढी नगरपालिकाले आयोजना गरेको स्वास्थ्य शिविरबाट सुरुवात गरि यस वर्षभित्र नगरका सबै नगरवासिको साथै अन्य पालिका तथा जिल्लाबाट आउने सेवाग्राहीको समेत  मिर्गौलाको निःशुल्क परिक्षण गर्ने लक्ष्य राखिएको छ ।
         दिक्तेलरुपाकोट मझुवागढी नगरपालिकाले नगरमा जेष्ठ नागरिकको स्वास्थ्य लाई मध्यनजर गरि जेष्ठ नागरिक स्वास्थ्य कार्यक्रम मार्फत नगरका सम्पूर्ण वडाहरुका प्रत्येक टोल वस्ती तथा घरघरमै पुगि स्वास्थ्य परिक्षण गर्ने कार्यक्रम यसै बर्षबाट सुरुवात गरि निरन्तर सञ्चालनमा रहेको कुरा जानकारी गराउँदै आजकै दिनवाट जेष्ठ नागरिकको निःशुल्क मिर्गौला परिक्षण साथै रगतमा चिनिको मात्राको परिक्षण निरन्तर गरिने छ  । 
साथै 

• ० नियमित स्वास्थ्य परिक्षण
• ० पाठेघर खस्ने समस्याको स्कृनिङ
• ० ५बर्ष मुनिका बालबालिकाको नियमित परिक्षण (घरघरमा) नियमित भइरहेको र निरन्तर भइरहने छ ।

         निकट भविश्यमा पाठेघर खस्ने सम्बन्धि समस्याको स्कृनिङ, मुटु रोग, अन्य जनरल परिक्षण तथा आयुर्वेद मार्फत हुने उपचारको समेत निःशुल्क स्वास्थ्य  परिक्षणको लागि स्वास्थ्य शिविरको आयोजना गरिनेछ ।
        नागरिकको स्वास्थ्यप्रति नगरपालिका संवेदिनशील हुँदै निरन्तर स्वास्थ्य शिविर भइरहने जानकारी गराउन चाहन्छौँ ।

डा. के के राई