हलेसीन्युजडेस्क, खोटाङ /

खोटाङको हलेसी तुवाचुङ नगरपालिकाले केहीदिनदेखि सञ्चालनमा ल्याइएको एम्वुलेन्स सेवाको सम्बन्धमा थप स्पष्ट पारेको छ । नगरपालिकाले सञ्चालनमा ल्याएको एम्वुलेन्स सेवाका सम्बन्धमा केहीदिन यता सामाजिक सञ्जालमार्फत असन्तोषपूर्ण अभिव्यक्ति आएको तर्फ संकेत गर्दै यस विषयमा गम्भिर ध्यानाकर्षण भएको भन्दै नगरपालिकाले प्रेस विज्ञप्ति मार्फत स्पष्ट पारेकोे हो ।

नगर प्रवक्ता एवं वडा नं. ७ का वडाध्यक्ष कमल  गिरीद्धारा सोमवार हस्ताक्षरित विज्ञप्तिमा नगरपालिकाले शुरुवाती दिनदेखि नै स्वास्थ्य सेवा प्रति सचेत भै कार्य गर्दै आइरहेको स्पष्ट पार्दै हलेसी तुवाचुङ नगरपालिकाले राष्ट्रव्यापि बनाएको पहिचान, नगरवासीबाट प्राप्त स्नेह, सद्भाव, सहयोगलाई धमिलो पार्ने कुचेष्टाका साथ अनर्गल प्रचार भैरहेकोले सत्य तथ्य नबुझी नगरपालिकाको प्रतिष्ठामा आँच पुर्याउने गरी सामाजिक सञ्जालमा गरिएका यस्ता पोष्टहरुप्रति सचेत रहन नगरवासीहरुमा अनुरोध समेत गरिएको छ ।

गत जेष्ठ २७ गतेदेखि हलेसी तुवाचुङ नगरपालिकाले नगरभित्रका नागरिकलाई स्वास्थ्य चौकीसम्म तथा जिल्ला बाहिर उपचारमा जान आउन सहज बनाउने उद्देश्यले राष्ट्रिय एम्बुलेन्स निर्देशिका-२०७८ ले वर्गीकरण गरे अनुसारको आवश्यक उपकरण र औषधिसहित ‘ख’ वर्गको एम्बुलेन्स सञ्चालनमा ल्याएको हो ।

राष्ट्रिय एम्बुलेन्स निर्देशिका-२०७८ ले ‘ख’ वर्गको एम्बुलेन्समा आवश्यक उपकरण र औषधि हुनुपर्ने व्यवस्था गरे अनुसार नगरपालिकाले २२ वटा उपकरण जडित र जिपिएस ट्रयाकिङ सिस्टम भएको एम्बुलेन्स सञ्चालनमा ल्याएको हो  । जिपिएस ट्रयाकिङ सिस्टम भएकाले एम्बुलेन्स कहाँ छ, कहाँ रनिङ गरिरहेको छ भन्ने नगरपालिकाबाटै ट्रयाकिङ गर्न सकिने नगरपालिकाको भनाई छ । 

गर्भवती र सुत्केरीका लागि नजिकैको स्वास्थ्य चौकीमा जान वा स्वास्थ्यकर्मीको रिफरमा उहाँहरुलाई बाहिर अस्पतालसम्म जान निःशुल्क एम्बुलेन्स सेवा दिने निर्णय गरिएको नगरपालिका श्रोतले जनाएको छ । अन्यका हकमा भने भाडादर तोकिएको छ ।

गत आषाढ १२ गते वाहुनीडाँडाकी एक महिला विरामीलाई वाहुनी डाँडा हुदै काठमाण्डौँसम्म रु २१ हजार एकसय शुल्क लिई एम्वुलेन्स सेवा उपलव्ध गराइएकोमा स्थानीय एक युवाले आफ्नो सामाजिक सञ्जाल मार्फत उक्त नगदी रसिदको फोटोकपी सहित असन्तुष्टि व्यक्त गर्दै पोस्ट गरेका थिए । यस सम्बन्धमा स्पष्ट पार्दै विज्ञप्तिमा भनिएको छ –‘‘सामाजिक सञ्जालमा भएको नगदी रसिद बारेमा फैलिएको अफवाहको वास्तविकता नगर अस्पताल व्यवस्थापन तथा सञ्चालन समितिको मिति २०८० जेष्ठ २६ गतेको निर्णय बमोजिम नगर अस्पतालदेखि काठमाण्डौँसम्मको सेवा शुल्क रु १६ हजार लाग्नेछ ।, नगरपालिकाको एम्वुलेन्स सेवा सञ्चालन तथा व्यस्थापन  कार्यविधि-२०८० को दफा ८ विविध (६) अनुसार स्वास्थ्यकर्मी सहित जिल्ला बाहिरको अस्पतालमा विरामी लानु परेमा निर्धारण गरिएको एम्वुलेन्स सेवा शुल्कमा थप १० प्रतिशत शुल्क लाग्नेछ, जस अनुसार रु १६ हजार एम्वुलेन्स सेवा शुल्कमा  १० प्रतिशतले हुने थप रु .१ हजार ६ सय र नगर अस्पतालदेखि वाहुनीडाँडा वडा कार्यालयभन्दा भित्री अन्य क्षेत्र सम्मको आवत जावतको सेवा शुल्क रु ६ हजार लाग्ने भए तापनि एम्वुलेन्स वाहुनीडाँडाबाट सिमलचौर हुदै सिधै काठमाण्डौँ गएको हुदा रु ६ हजार बाट रु.२ हजार ५ सय घटाइ हुन आउने रकम ३ हजार ५सय समेत जम्मा एकमुस्ट रकम रु २१ हजार  रसिद नं. ८५१ कटाई लिइएको हो ।’’ तर गर्भवति र सुत्केरी महिलाका लागि भने निशुल्क व्यवस्था भएको नगरपालिकाले जनाएको छ ।

विज्ञप्तिमा नगरपालिकाले गरेका काम कारवाही वा अन्य विषयमा कुनै शंका लागेमा वा जानकारी चाहिएमा जिम्मेवार व्यक्तिसँग बुझ्न अनुरोध पनि गरिएको छ । तथ्यपरक प्रमाण सहित यथार्थपरक आलोचनाले मात्र समाज रुपान्तरण, सुशासन प्रवर्द्धन र दायित्ववोधमा टेवा पुग्ने कुरामा नगरपालिकाले  जोड दिएको छ ।