हलेसीन्युजडेस्क, खोटाङ /

खोटाङका दिक्तेलवजारवासीले नेपाल प्रहरीको स्लोगन ‘‘सत्य, सेवा, सुरक्षणम् ’’ लाई प्रत्यक्षतः अनुभूत गर्न पाएका छन् । गत बैशाख ३१ गते राती १.४० मिनटको समयमा नापी कार्यालय नजिक व्यापार व्यवसाय गर्दै आएका महेश वजिमयको घरवाहिर ग्याँस सिलिण्डर, मोटरवाइक जलिरहेको अवस्थामा गस्तिमा खटिरहेका सुरक्षाकर्मीहरुले तत्कालै आगो नियन्त्रणमा लिई दिक्तेलवजारलाई ठूलो आगलागीको दुर्घटना हुनबाट जोगाएपछि समग्र वजारवासीले पुनः एकचोटी प्रहरी संस्थाबाट ‘‘सत्य, सेवा, सुरक्षणम् ’’ को प्रत्यक्ष अनुभूति गर्न पाएका हुन । 

जिल्ला प्रहरी कार्यालय खोटाङबाट नियमित झै त्यो दिन पनि वेलुकी १० वजेदेखि २ वजेसम्मका लागि एउटा टोली सुरक्षार्थ वजारमा गस्ति गरिरहेको थियो । प्रहरी हवल्दार प्रकाश तामाङको कमाण्डमा प्रहरी जवान दुर्गाप्रसाद निरौला र लिलाबहादुर थापाले गस्ति गरिरहनु भएको थियो । त्रिवेणीचोकदेखि जिल्ला प्रशासन जाने बाटोमा हिडिरहेको गस्तिले टाढाबाट महेशको पसलबाहिर कपडाको पुल्ठो जल्दै त्यसबाट पार्किङमा राखिएको मोटरवाइक जलिरहेको र ग्यास भरिएको सिलिण्डरमा आगोले भेटन लागेको अवस्थामा देखेपछि तत्काल होहल्ला गरेर आगोलाई नियन्त्रणमा लिन सफल भए । यतिन्जेल २२० सिसिको मोटरवाइकको अधिकांस भाग जलिसकेको र आगोको लप्कोले महेशको घरको वरण्डामा छोइसकेको थियो । यदि ग्यास भरिएको १५ वटा सिलिण्डर आगोबाट विष्फोट भैदिएको भए त्यसबाट वजारलाई नै खरानी बनाउने सम्भावना थियो । 

रातदिन नभनी समाज र समुदायको सुरक्षार्थ खटिने प्रहरीप्रति यो घटनाले थप नागरिकहरुको भावनामा उच्च सम्मान पैदा भएको भन्नुहुन्छ-नेपाली कांग्रेसका नेता तथा भूमि आयोग खोटाङका सदस्य सुमनवावु आचार्य । महेशको घर नजिकै रहनुहुने आचार्यले घटना घटेको विहानै आफ्नो सामाजिक सञ्जालमा आगलागीबाट हुने भयावह दुर्घटनाको कल्पना गर्दै त्यो दुर्घटनाबाट जोगाउने प्रहरीहरुलाई नागरिकले अभिनन्दन गरिनु पर्ने भनी प्रसंसा गर्नुभएको छ ।  

एक स्थानीयका  अनुसार उक्त घटना अपराधीक मानसिकताबाट नियोजित रुपमा घटाउन खोजिएको हुँदा यसको खोज अनुसन्धान गरिनु पर्ने देखिन्छ । केही महिना अगाडि वजिमयको पसलमा चोर्ने उद्धेश्यले ढोका फोड्ने प्रयास समेत भएको बताइन्छ ।

प्रहरीको पवित्र सुरक्षा सेवाप्रति सम्मानार्थ दिक्तेलवजारस्थित जेष्ठ नागरिक संघले एक कार्यक्रमको आयोजना गर्दै राती महशको घरमा आगो लाग्ने दुर्घटनालाई तत्काल नियन्त्रण गरी आगलागीबाट ठूलोजनधनको क्षति हुनबाट जोगाएको भन्दै सो घटनाका समयमा गस्तिमा रहेका  प्रहरी हवल्दार तामाङ, प्रहरी जवानहरु निरौला र थापालाई सोमवार अभिनन्दन गरेको छ । उहाँहरुलाई प्रदेश सांसद पाँचकर्ण राईले जनही  रु पाँचहजार र घरधनि वजिमयले जनही रु चारहजार नगद पुरस्कार प्रदान गर्दै यसबाट नागरिकहरुलाई प्रहरी हाम्रो सुरक्षासाथीको अनुभूति भएको बताउनुभएको छ । सोही अवसरमा उहाँहरुलाई प्रदेश सांसद राई, प्रमुख जिल्ला अधिकारी सूर्यप्रसाद सेढाई र प्रहरी नायव उपरिक्षक मञ्जिल मुकारुङले अभिनन्दन गर्नुभएको थियो ।