हलेसीन्युजडेस्क, खोटाङ /

खोटाङको दिक्तेल रुपाकोट मझुवागढी नगरपालिका वडा नं. ७ दोर्पा चिउरीडाँडामा शिक्षा सुधार सम्बन्धि एकदिने कार्यशाला गोष्ठी सम्पन्न भएको छ । वडा नं.७ दोर्पाका वडाध्यक्ष हरिप्रसाद चौलागाईको अध्यक्षता तथा नगरप्रमुख एवं नगर शिक्षा समितिका संयोजक तीर्थराज भट्टराईको प्रमुख आतिथ्यतामा मंसिर १८ गते वडा कार्यालयको सभाहलमा वडास्तरीय शैक्षिक सुधारका सम्बन्धमा एकदिने कार्यशाला गोष्ठी सम्पन्न भएको वडाध्यक्ष चौलागाईले हलेसी एफएमलाई बताउनुभयो ।

कार्यशाला गोष्ठीमा शिक्षाविद् डा.तोयानाथ खनालले वडास्तरीय तीन वर्षे शैक्षिक कार्य योजना प्रस्तुत गर्नुभएको थियो । उहाँले शैक्षिक सुधारका लागि व्यवहारिक पद्धतिलाई अवलम्वन गर्न सकिने र महँगो वजेट चाहिन्छ भन्ने अवधारणा गलत सिद्ध गर्न सकिने बताउनुभयो । वजेटको अभावमा पनि कार्ययोजना बनाएर शिक्षा सुधार गर्न सकिने भन्दै त्यसका लागि उहाँले २९ बुँदे बिना रकममा अवलम्वन गर्न सकिने कार्य योजनाको व्याख्या गर्नुभयो । यस्तै कम लगानीमा १७ बुँदे कार्य योजना र पर्याप्त वजेटको सदुपयोग गर्दै लागू गर्न सकिने ११ बुँदे कार्य योजनाका बारेमा पनि उहाँले सविस्तार व्याख्या गर्नुभएको थियो ।

यस्तै वडा नं. १२ जाल्पाका वडाध्यक्ष एवं सामाजिक विकास समितिका संयोजक दानबहादुर राईले कार्यशाला गोष्ठीमा प्रस्तुत कार्य योजना केवल वडा नं. ७ का लागि मात्र नभएर समग्र नगरपालिका, जिल्ला र केन्द्रिय सरकारका लागि समेत सहयोगी शैक्षिक कार्ययोजनाका रुपमा उपयोगी रहेको बताउनुभयो ।

कार्यक्रमका प्रमुख अतिथि नगरप्रमुख भट्टराईले शिक्षा सबै क्षेत्रको जननी भएकोले संभावना भएसम्म नगरपालिकाले आगामी वर्षमा कम्तिमा पनि २० प्रतिशतभन्दा वढी वजेट शैक्षिक क्षेत्रका लागि विनियोजन गर्ने प्रतिवद्धता व्यक्त गर्नुभयो ।

अधिकांस वक्ताहरुले शिक्षामा सुधार गर्न अभिभावक, जनप्रतिनिधिहरु र शिक्षकहरुले अग्रसरता र एक्यवद्धता गरे शिक्षामा सुधार हुने निश्चित रहेको विचार प्रकट गर्नुभएको थियो ।

वडाध्यक्ष हरिप्रसाद चौलागाईको अध्यक्षतामा सम्पन्न कार्यशालामा प्रमुख अतिथि तथा  नगरप्रमुख तीर्थराज भट्टराई, शिक्षाविद् डा. तोयानाथ खनालका साथै वडा नं. १२ का वडाध्यक्ष दानबहादुर राई,  नगर शिक्षा सुधार कार्यदलका संयोजक एवं शैक्षिक अभियन्ता सूर्यबहादुर राई, भलेश्वर मावि काभ्रेका प्रअ रामचन्द्र थापा, जालपा माविका प्रअ दिलबहादुर राई, विध्योदय माविका विव्यास अध्यक्ष शहरमान राई, वडा नं. ७ का वडा सदस्य हरिकुमार राई, शैक्षिक अभियन्ता तथा नगर शिक्षा सुधार कार्यदलका सदस्य कृष्ण बुढाथोकी, नेराशि संगठनका अध्यक्ष टंक कटुवाल, नेशिसंघका कुमार खनाल लगायत स्थानीय अभिभावकहरुको उपस्थिति रहेको थियो ।

कार्यशाला गोष्ठीको समापन पछि पनि साँझ ६ वजेदेखि अवेरसम्म शैक्षिक सुधारका विषयमा गहन छलफल गरिएको नगरप्रमुख भट्टराईले बताउनुभयो ।