हलेसीन्युजडेस्क, खोटाङ /

खोटाङको साकेला गाउँपालिकाले आफ्नै ठाउँमा किसानलाई रोजगारी प्रदान गर्नुका साथै आय आर्जनमा सुधार ल्याई जीवनस्तर उकास्न विभिन्न कार्यक्रम अघि सारेको छ । व्यवसायिक रुपमा कृषि खेतीप्रति किसानलाई आकर्षित गराई आयस्तरमा सुधार ल्याउन गाउँपालिकाले लागत साझेदारीमा कृषि समाग्री उपलब्ध गराउनुका साथै अन्य विविध कार्यक्रम अघि सारेको हो ।

यसै क्रममा साकेला गाउँपालिका–३ स्थित जन विकास बहुउद्देश्यीय सहकारी संस्था खिदिमालाई गाउँपालिकाले विभिन्न समाग्री कृषि समूह मार्फत किसानलाई प्रदान गरिएको जनाइएको छ । 

गाउँपालिकास्थित कृषि विकास शाखाको वार्षिक स्वीकृत कार्यक्रम तरकारी खेती प्रवर्द्धन कार्यक्रम अन्तर्गत उक्त सहकारी संस्थालाई गाउँपालिकाको रु.९ लाख ७५ हजार र समूहको रु.२ लाख १० हजार ४४० गरि जम्मा रु.११ लाख ८५ हजार ४४० रकमबाट १२० थान टनेल, २ थान हाते ट्याक्टर र ४ थान स्पेयर   (विषादी छर्किने) मेसिन हस्तान्तरण गरिएको छ । गाउँपालिका अध्यक्ष रवि प्रकाश राईले समूहका अध्यक्ष दूधराज तामाङ मार्फत किसानलाई उक्त समाग्री हस्तान्तरण गर्नुभएको हो । 

उक्त समूहमा १२० जना कृषकहरु आवद्ध रहेका छन् । उनिहरुले खिदिमा क्षेत्रका १५ रोपनी जग्गामा साग, सिमी, मूला, टमटर, अकबरे खुर्सानी, काँक्रा, फर्सी लगायतका विभिन्न प्रजातिका तरकारी खेती यसै वर्षदेखि सुरु गरेको उक्त समूहका अध्यक्ष तामाङले बताउनुभयो । 
कृषकलाई रोजगारी प्रदान गरि आयस्तरमा सुधार गर्दै ताजा तरकारी उत्पादनमा वृद्धि गर्ने लक्ष्य गाउँपालिकाले लिएको अध्यक्ष राईले बताउनुभयो । साकेला गाउँपालिकाले पछिल्लो समय कृषिमा दिँदै आएको अनुदान वितरण बन्द गरेको छ । यसअघि किसानलाई उपलब्ध गराईएको अनुदान बालुवामा हालेको पानी भएपछि अनुदानलाई बन्द गरि सहुलियत दरमा ऋण प्रदान गर्ने नीति ल्याएको अध्यक्ष राई बताउनुहुन्छ । उहाँ भन्नुहुन्छ–‘अघिल्लो सरकारको पालामा कृषि क्षेत्रमा भएको लगानी हेरौं, बाख्राको खोरमा बाख्रा छैन अहिले त खोरै छैन, माछा पोखरी हेरौ पोखरी मात्र छ, भैंसीको गोठ हेरौं गोठै भत्किसकेको छ । अनि कहाँबाट समृद्धि आउँछ ?’ 

पालिकाले गरेको लगानी त्यसै खेर गएको पाएपछि राज्यको रकम दुरुपयोग हुन नदिन हामीले कृषिमा अनुदान हैन ऋणको व्यवस्था गरेका छौं, अध्यक्ष राईले भन्नुभयो –‘सोही नीति अनुरुप आगामी आर्थिक वर्षदेखि कार्यान्वयन गर्नेगरि केही रकम बिनियोजन गरेका छौं । अब हामी किसानलाई ऋण प्रवाह गर्नका लागि छुट्टै कार्यविधिछ बनाएर कार्यान्वयनमा लाग्नेछौं, यसबाट वास्तविक किसानको पहिचान हुनेछ ।’

अध्यक्ष राई थप्नुहुन्छ–‘किसानलाई धनि बनाईयो भने पालिका आफै धनी हुन्छ, समृद्धि छाउँछ तर राज्यको लगानीलाई दुरुपयोग हुन दिनेछैनौं ।’ 

अब साकेलाको कुन भूगोलमा के उत्पादन हुन्छ सोही अनुरुप पालिकाले लगानी गर्दै जाने बताइन्छ । पालिकाले आफ्नो भूगोलभित्रको कुन कुन स्थानमा के के उत्पादन गर्न सकिन्छ भनेर माटो परीक्षण समेत गरिसकेको जनाइएकोछ ।