हलेसीन्युजडेस्क, खोटाङ

नेपाल कम्युनिष्ट पार्टी एमाले जिल्ला कमिटी खोटाङको आँठौ जिल्ला अधिवेशनमा  सहमतिको आधारबाट  नेतृत्व चयन गर्ने वातावरण नभएपछि अन्ततः निर्वाचनको प्रकृयामा अगाडि बढेको छ ।

आज (शुक्रवार) विहान १० वजेदेखि नै मतदान शुरु भएको स्थलगत रिपोर्टिङमा रहनुभएको हलेसी एफएम संवाददाताले बताउनुभयो । अहिले प्रतिनिधिहरुबाट मतदान जारी छ ।

निर्वाचनमा ५७९ जना प्रतिनिधिले मताधिकार प्रयोग गरी तीनवर्षे कार्यकाल हाँक्ने नेतृत्व चयन गर्नेछन् । एमाले खोटाङको विगत अधिवेशनमा सहमतिबाट नेतृत्व चयन हुदै आएकोमा यो पटक निर्वाचन प्रणाली अख्तियार गरिएको पहिलो अधिवेशन बताइन्छ ।

निर्वाचन कमिटिले बिहीबार राती ९ः३० बजेपछि उम्मेदवारको प्रारम्भिक नामावली प्रकाशन गरेको थियो ।

निर्वाचन कमिटिका अनुसार अध्यक्षमा रामप्रसाद दंगाल र देवविक्रम राईको उम्मेदवारी परेको छ । दंगाल वर्तमान अध्यक्ष र राई उपाध्यक्ष हुनुहुन्छ । उपाध्यक्षमा कुमार प्रसाद आचार्य र उपिन कुमार राईको प्रतिस्पर्धा हुदैछ । आचार्य पार्टीको वर्तमान सचिव र राई सचिवालय सदस्य हुनुहुन्छ । सचिवमा सुरेन्द्र कुमार राई निर्विरोध चयन हुनुभएको छ । राई यसअघि पार्टीको उपसचिव हुनुहुन्थ्यो ।

पुरुष उपसचिवमा गीरेन्द्र बहादुर राई, कमल ढकाल, गोपालचन्द्र आचार्य, गोपिकृष्ण खड्का, चक्र बहादुर राई (दिलचक्र), दिनेश कुमार राई, राजन कुमार बन्जारा, युवराज रिजालले प्रतिस्पर्धा  गर्नुहुनेछ। महिला उपसचिवमा कविता राई र भगवती प्रधान उम्मेदवार हुनुहुन्छ ।

बुधबार दिक्तेलबजारस्थित बहुउद्देश्य कभर्डहल माटिकोरेमा नेकपा एमालेका केन्द्रीय उपाध्यक्ष एवंम् बाग्मती प्रदेशका पूर्व मुख्यमन्त्री अष्टलक्ष्मी शाक्यले अधिवेशन उद्घाटन गर्नुभएको थियो ।

[ यो पनि-एमाले आठौँ जिल्ला अधिवेशनको उद्घाटन सम्पन्न / आज नेतृत्व चयन हुने }