हलेसीन्युजडेस्क, खोटाङ /

यतिखेर डिजिटल युगको बाक्लो सञ्जालभित्र सञ्चार माध्यमहरु चुस्त र शक्तिशालि बनेकाछन् । जतिखेर सञ्चार क्षेत्र ढुकढुकी मात्रै लिएर लोक संसारमा सुस्त सुस्त चिनिन खोजिरहेको थियो, त्यो वेला कलम र कागजको भरमा नेपाली साहित्यलाई विश्व साहित्यको सँघारमा प्रवेश गराउने सशक्त हस्ताक्षर लक्ष्मी प्रसाद देवकोटा आजको शक्तिशाली मिडियाको स्पेशमा भने त्यति अटाउन सकेको देखिन्न । आज उहाँको ११५ औँ जन्मजयन्ती हो । 

नेपाली साहित्यिक जगतमा महाकविको पदबाट सूशोभित देवकोटाको जन्म पण्डित तीलमाधव र अमर राज्यलक्ष्मी देवीका तेस्रो सन्तानका रुपमा वि.सं. १९६६ कार्तिक २७ गते तिहारको लक्ष्मी पूजाका दिन डिल्लीबजार, धोबीधारा, काठमाडौँमा  भएको थियो । गाई तिहार/औँशी लक्ष्मीपूजाका दिन उहाँको जन्म भएका हुनाले लक्ष्मीप्रसाद नाम राखिए पनि न्वारानको नाउँ भने तीर्थमाधव देवकोटा हो ।

महाकवि देवकोटा नेपाली साहित्यका कविता, आख्यान, नाटक र निबन्ध गरी साहित्यका चारवटै विधामा कलम चलाउने बहुमुखी प्रतिभाका धनी मानिनुहुन्छ । उहाँले कविता र निबन्ध विधामा गरेका योगदानहरू उच्च कोटिको मानिन्छन् । देवकोटासँग धेरै छोटो समयमा साहित्यिक जटिलता र दार्शनिक घनत्वसहित लामो महाकाव्य र उत्कृष्ट कविता रचना गर्ने क्षमता थियो । 

उहाँले मुनामदन, सुलोचना, शाकुन्तलजस्ता अद्वितीय कृतिहरू लेखेर विश्व साहित्य जगतमा नेपाली साहित्यलाई परिचित गराउनुभयो । विशेष गरी मुनामदन कृति उहाँको अद्धितिय कृति मानिन्छ । देवकोटाद्वारा लिखित वियोगान्त खण्डकाव्य मुनामदन देवकोटाको मृत्युको पाँच दशक पछिसम्म पनि साझा प्रकाशनद्वारा अत्यधिक बिक्री हुने कृतिमा पर्दछ । मुनामदन नेपाली जनजीवनमा भिजेको पहिलो नेपाली कृति हो । 

यति विलक्षण साहित्यिक प्रतिभाका धनि महाकवि लक्ष्मीप्रसाद देवकोटाको नाम लक्ष्मी प्रसाद भएपनि केवल उहाँसँग देवी सरस्वतीमात्र दाहिना भैरहिन, यध्यपि देवी लक्ष्मी उहाँको पहुँचभन्दा सदैव टाढा नै रहन चाहिन् । जीवनपर्यन्त  भौतिक अभाव र समस्याले उहाँलाई लखेटिरह्यो । 

महाकवि देवकोटाको वि.सं. २०१६ भाद्र २९ गते देहान्त भएको थियो ।

 ११५ औँ जन्मजयन्तीको ऐतिहासिक दिनमा नेपाली साहित्यिक आकाशमा कहिल्यै नअस्ताउने नक्षत्रका रुपमा उदाएका साहित्यिक चिराग महाकवि लक्ष्मीप्रसाद देवकोटालाई हलेसी एफएम साहित्यिक श्रद्धासुमन अर्पण गर्दछ ।