हलेसीन्युजडेस्क, खोटाङ

खोटाङको रावावेशी गाउपालिका वडा नं.४ डुम्रे धारापानीस्थित देउराली माविमा अध्ययनरतः चार छात्र छात्राहरुलाई प्रोत्साहन रकम प्रदान गरिएको छ । डुम्रेधारापानी गोठपानीका अग्रज व्यक्तित्व रामबहादुर तामाङको २०७८ सालमा देहान्त भएपछि उहाँको नाममा वि.सं. २०७९ सालमा परिवारबाट रु १ लाख जम्मा गरेर स्थापना गरिएको स्वर्गीय रामबहादुर स्मृति अक्षयकोषमा प्राप्त व्याज रकमबाट देउराली मावि डुम्रेमा अध्ययनरतः विध्यार्थीहरुवीच अनुशासन, अध्ययनशिलता, नियमितता, सरसफाई र जेहेन्दारमध्ये चार छात्र छात्राहरुलाई अक्षयकोष संस्थापकको तर्फबाट जनही रु १५ सयका दरले प्रोत्साहन रकम प्रदान गरिएको हो ।

बुधवार देउराली माविको प्राङ्गणमा विध्यालय व्यवस्थापन समितिका अध्यक्ष तथा वडा नं. ४ डुम्रेधारापानीका वडाध्यक्ष ज्ञानबहादुर पाण्डेको सभापतित्वमा भएको वृहत कार्यक्रममा स्वर्गीय रामबहादुरका छोरा तथा कार्यक्रमका प्रमुख अतिथि ज्ञानबहादुर तामाङले कक्षा २ मा अध्ययनरत छात्रा शिक्षा अधिकारी, कक्षा ७ मा अध्ययनरत छात्र सन्देश वास्तोला, कक्षा ९ मा अध्ययनरत छात्र मेघनाथ घिमिरे तथा कक्षा ११ मा अध्ययनरत छात्रा कविता भट्टराईलाई प्रोत्साहन रकम वापत जनही रु १५ सय प्रदान गर्नु भएको सोही विध्यालयका शिक्षक दिपेन्द्र अधिकारीले जानकारी गराउनुभयो ।

सोही अवसरमा प्रमुख अतिथि तामाङले कार्यक्रममा उपस्थित रहेका अन्य विध्यार्थीहरुलाई लेख्नका निम्ति भनेर प्रति विध्यार्थी २ वटा कापी समेत प्रदान गर्नुभएको थियो ।

शैक्षिक र सामाजिक क्षेत्रमा विगत देखि नै चासो राख्दै सहयोग पुराउदै आउनु भएका तामाङ हाल अमेरिकामा रहदै आउनुभएको थाहा भएको छ ।