हलेसीन्युजडेस्क, खोटाङ /

खोटाङमा नेपाली कांग्रेसको आन्तरिक विशेष अभियान सम्पन्न भएको छ । नेपाली कांग्रेस केन्द्रिय समितिको शेड्युल अनुसार पहिलो चरणको कार्यक्रम अन्तर्गत साउन २० देखि ३० गतेसम्म ७७ जिल्लामा तोकिएको विशेष आन्तरिक अभियान खोटाङमा केन्द्रिय प्रतिनिधि यामबहादुर गुरुङको प्रमुख आतिथ्यतामा आज वीपी स्मृति भवन दिक्तेलमा सम्पन्न भएको हो ।

केन्द्रिय कार्यालयले कांग्रेस केन्द्रिय नेतृ गोमा भट्टराईलाई खोटाङका लागि केन्द्रिय प्रतिनिधि तोकेको भएपनि उहाँको आफ्नी भाउजुको दुखद निधनका कारण निर्धारित समयमा उहाँको उपस्थिति सम्भव नभएपछि कांग्रेस नेता यामबहादुर गुरुङ केन्द्रिय प्रतिनिधिका रुपमा आज विहान खोटाङ आइपुग्नुभएको जिल्ला सचिव ज्ञानेन्द्र जोशीले बताउनुभयो ।

प्रमुख अतिथिका रुपमा बोल्दै केन्द्रिय प्रतिनिधि गुरुङले पार्टीको महत्वपूर्ण जिम्मेवारी वोकेर खोटाङ आउने अवसर प्राप्त भएकोमा आफू हर्षित भएको बताउनुभयो । उहाँले अब केन्द्रको छहारीमा खोटाङ र आफ्नो जिल्ला लमजुङवीच सांगठानिक र भावनात्मक सम्बन्ध गाँसिएको उल्लेख गर्नुभयो । पार्टीले ७७ जिल्लामा आन्तरिक विशेष अभियान सञ्चालन गरेर प्रत्येक जिल्लाको वास्तविक सांगठानिक अवस्था बुझ्ने र भएको कमि कमजोरीलाई सुधार्ने उद्धेश्य राखेको उहाँको कथन थियो ।

कार्यक्रममा खोटाङ कांग्रेसका तर्फबाट भातृ संस्थाहरुमा मनोनित केन्दिय सदस्य, प्रदेश सदस्यहरुलाई खादा ओढाएर सम्मान प्रकट गरिएको थियो ।

आजै कांग्रेसका नेता विष्णुराज राईलाई नेपाली कांग्रेस जिल्ला कार्य समितिमा मनोनित गरिएको थियो ।

कार्यक्रममा उपसभापति तीर्थराज भट्टराई, उपसभापति इवन राई, महाधिवेशन प्रतिनिधि सुमनवावु आचार्य, वरिष्ठ पत्रकार कृष्ण आचार्य, तरुणदल केन्द्रिय सदस्य तथा नेता रोजन राई, जिल्ला सदस्य विष्णुराज राई, दिक्तेल रुपाकोट मझुवागढी नगर कार्य समिति सभापति प्रकाश श्रेष्ठ रावावेशी गाउँ कार्य पालिका सभापति फटिककुमार श्रेष्ठ, नेवि संघ केन्द्रिय सदस्य राजकुमार बस्नेत, प्रदेश प्रतिनिधि अन्जना बस्नेत लगायतले आफ्नो धारणा राख्नुभएको थियो ।

जिल्ला सभापति विष्णुकुमार राईको सभापतित्वमा सम्पन्न नेपाली कांग्रेस खोटाङको आन्तरिक विशेष अभियानको सञ्चालन सचिव ज्ञानेन्द्र जोशीले गर्नुभएको थियो ।