हलेसीन्युजडेस्क, खोटाङ /

खोटाङको दिक्तेल रुपाकोट मझुवागढी नगरपालिका भित्र सञ्चालनमा रहेका आधारभूत तथा माध्यमिक विध्यालय तहका प्रधानाध्यापकहरुलाई क्षमता विकास तालिम प्रदान गरिएको छ । नगरपालिकाका नगरप्रमुख एवं नगर शिक्षा समितिका संयोजक तीर्थराज भट्टराईको अध्यक्षतामा नगरपालिका भित्रका ३५ जना प्रधानाध्यापक एवं  सह प्रधानाध्यापकहरुले आज तालिममा सहभागिता  जनाउनु भएको नगरपालिका अन्तर्गत शिक्षा शाखाले जनाएको छ ।

                   तालिमका केही झलकहरु

तालिमको प्रारम्भमा आधारभूत तथा माध्यामिक विध्यालय तहका प्राधानाध्यापकहरुको क्षमता विकास सम्बन्धि तयार गरिएको कार्यपत्रलाई शिक्षाविद डा.तोयानाथ खनालले छलफलका लागि प्रस्तुत गर्नुभएको थियो । 

कार्यपत्रको प्रस्तुतिसँगै सहभागी प्रधानाध्यापकहरुका वीच अन्तरकृयात्मक कार्यक्रम सम्पन्न भयो । 

दोश्रो सत्रमा आधारभूत तथा माध्यामिक विध्यालयका प्रधानाध्यापकहरुको क्षमता विकासका लागि के कस्ता कुराहरुमा ध्यान दिनु आबश्यक पर्दछ भन्ने विषयमा छलफल गरिएको थियो । सोही क्रममा सरस्वती माध्यामिक विध्यालय दिक्तेलका पूर्वप्र.अ ध्यानबहादुर राईले आफूले दशकौँ प्रधानाध्यापकको जिम्मेवारी सम्हाल्दा प्राप्त गरेको अनुभवलाई प्रस्तुत गर्नुभयो । उहाँले प्रधानाध्यापकको जिम्मेवारी शिक्षक तथा अभिभावकीय जिम्मेवारी समेत रहेको बताउदै प्रधानाध्यापकले व्यवस्थापकीय र कुशल नेतृत्वको क्षमता समेत प्रदर्शन गर्नुपर्नेमा जोड दिनुभयो । उहाँले नेतृत्व विकास तालिमबाट प्रधानाध्यापकहरुलाई व्यावहारिक र समयसापेक्षित बनाउनमा मद्धत पुग्ने बताउनुभयो । 

अर्का बक्ता काभ्रे स्थित भालेश्वर मावि पनौतीका प्रधानाध्यापक रामचन्द्र थापाले तालिमको अवधिमा आफूमा भएका अनुभवहरुको आदान प्रदान, विभिन्न विद्यालयहरुले गरेका नमूना र राम्रा प्रयासहरु तथा भावी दिनमा सुधारको लागि गर्नुपर्ने योजना निर्माणका साथै आफ्नो कार्य क्षेत्रमा आईपरेका नीतिगत समस्याहरु समाधान गर्न सहयोग पुग्ने बताउनुभयो । 

तालिममा शिक्षा सम्वन्धि बर्तमान नीतिगत व्यवस्था, विद्यार्थी मूल्याङन प्रणाली, स्थानीय पाठ्यक्रम, वालमैत्री विद्यालय र विद्यालय शान्ति क्षेत्र, विद्यालय सुपरिवेक्षण तथा शिक्षक पेशागत विकास, पेशागत मर्यादा, सदाचार, नैतिकता र जवाफदेहिता, विद्यालय व्यवस्थापन र सिकाईका समसामयिक प्रवृत्ति, शैक्षिक सुचना व्यवस्थापन प्रणाली र विद्यालयको आर्थिक व्यवस्थापन लगायतका विषयमा छलफल भएको नगरपालिकाका शैक्षिक सुधार कार्यदलका संयोजक सुर्यबहादुर राईले जानकारी दिनुभएको छ । 

यस्तै नगरले अधिकांश विद्यालयको फरक तरिकाले अनुगमन गरिरहेको  नगरपालिका प्रमुख तीर्थराज भट्टराईले बताउनुभयो । अनुगमनका क्रममा शिक्षक, विद्यार्थीसँग छलफल गर्ने गरिएको छ । छलफलमा उठेका विषयवस्तुलाई आधार मानेर नगरले आगामी योजनामा शिक्षा सुधारका योजना तय गर्ने नगरप्रमुख भट्टराईले बताउनु भयो ।

हालसम्म नगरपालिकाले शैक्षिक सुधारका क्रममा प्रधानाध्यापकहरुको विधिसम्मत व्यवस्थापन, शैक्षिक सुधार कार्यदल गठन र कार्यान्वयन, शैक्षिक सुधारका विभिन्न कार्यशाला आयोजना, आइटि प्रशासन सुधार, जीवनोपयोगी शिक्षाको अभ्यास, स्थानीय विज्ञ तथा अनुभवी शिक्षकहरुको पहलमा वडास्तरीय पाठ्यक्रम निर्माण लगायत कामहरु भैरहेको नगरप्रमुख भट्टराईको कथन रहेको छ ।