हलेसीन्युजडेस्क, खोटाङ /

नेपालीहरुको महत्वपूर्ण पर्व तिहारका अवसरमा सबैलार्ई शान्तिपूर्ण र मर्यादित ढंगले चाँडपर्व मनाउन जिल्ला प्रशासन कार्यालय, खोटाङले आग्रह गरेको छ । प्रमुख जिल्ला अधिकारी शिवकुमार कार्कीद्वारा हस्ताक्षरित सूचनामा शान्ति सुरक्षा एवं अमनचयनको अवस्थालाई सामान्य तुल्याई चाँडपर्व मनाउन आग्रह गरिएको हो । 

जिल्ला प्रशासन कार्यालय खोटाङद्धारा कात्तिक १३ गते मंगलवार जारी सूचनामा राष्ट्रिय चाँड तिहार, नेपाल सम्वत र छठको अवसरमा शुभकामना व्यक्त गर्दै चाँडबाड मनाउने क्रममा सानो असावधानीका कारण दिपावलीका लागि बालेको वत्तिबाट आगजनी हुने, गैर–कानूनी पटाकाजन्य वस्तुको प्रयोगबाट जीउज्यानको क्षति हुने, मादक पदार्थको सेवनबाट घर परिवार र समाजमा अशान्ति हुने, जुवा र सट्टेबाजी खेलबाट धन र मानको क्षति हुने जस्ता अवस्थाको सिर्जना हुन सक्ने सम्भावनाको हवाला दिँदै यसबाट जोगिएर राष्ट्रिय चाँड तिहार, नेपाल सम्वत र छठ पर्वलाई हर्षोल्लासका साथ मनाउन सबैलाई अनुरोध गरिएको छ ।  

संयमित र अनुशासित ढंगले चाँड मनाउन र देउसी, भैलो जस्ता कार्यक्रम रातिको ११ बजे सम्म मात्र सञ्चालन गर्न, जुवातास र सट्टेबाजी जस्ता खेल नखेल्न, नखेलाउन जिल्ला सुरक्षा समिति, खोटाङद्वारा सार्वजनिक सूचनामार्फत आग्रह गरिएको छ । 

यसैगरी जिल्लाको समग्र शान्ति सुरक्षाको अवस्थालाई मध्यनजर गरी देउसी, भैलो तथा नाँचगान जस्ता कार्यहरू गुनासोरहित तवरले सञ्चालन गर्नुका साथै सार्वजनिक यातायात, आवतजावत र जनजीवनलाई असर नपर्ने गरी मर्यादित, अनुशासित र शान्तिपूर्ण रुपमा सञ्चालन गर्नु गराउन अनुरोध गरिएको छ । 

पटका, झरझरे, भुइँचम्पा जस्ता विस्फोटकजन्य पदार्थ प्रयोग नगर्नु र यस्ता पदार्थहरूको निकासी, ओसारपसार एवम् विकी वितरण नगर्न  समेत जिल्ला प्रशासन कार्यालय  खोटाङले अनुरोध गरेको छ ।