हलेसीन्युजडेस्क, खोटाङ /

खोटाङको दिक्तेल रुपाकोट मझुवागढी नगरपालिकाले सदरमुकाम दिक्तेल आसपास खुला छाडिएका कुकुरहरुको स्थायी बन्ध्याकरण गराएको छ । सार्वजनिक स्थलहरुमा जथाभावी छाडिएका कुकुरहरुका कारण मानिसहरु आतंकित बन्नु परेको हुँदा दिक्तेल रुपाबोट मझुवागढी नगरपालिका र चितवनको रामपुरस्थित कृषि वन विज्ञान विश्व विध्यालयसँगको सहकार्यबाट जेष्ठ १० गते अपरान्ह र ११ गते विहान सदरमुकाम आसपासका छाडा कुकुरहरुलाई नियन्त्रणमा लिई स्थायी बन्ध्याकरण गरिएको हो ।

सडक र खुला स्थानहरुमा पाइने छाडा कुकुरहरुका कारण जो कोही हैरान हुनुपरेको गुनासो नगरपालिकामा समेत वारम्वार आएपछि कुकुरहरुको विगविगीलाई शान्त पार्न यो विधि अपनाएको नगरप्रमुख तीर्थराज भट्टराई बताउनुहुन्छ । 

यस्ता कुकुरहरु गाउँ पसेर कतिपय अवस्थामा गोठमा रहेका वाख्राको पाठो र कुखुराका चल्लाहरु समेत खाने गरेको किसानहरुको गुनासो सुनिन्छ । 

यस्ता समस्याको उचित निराकरणका रुपमा नगरपालिका र कृषि तथा वन विज्ञान विश्वविद्यालय रामपुर चितवनवीच बैशाख १५ गते भएको समझदारी अनुसार यो पटक छाडा तथा निजी कुकुरहरु ४० वटाको स्थायी बन्ध्याकरण गरिएको हो ।

कुकुर बन्ध्याकरणका लागि कृषि तथा वन विज्ञान विश्वविद्यालय रामपुर चितवनका सह–प्राध्यापक डाक्टर मनोज साहको नेतृत्वमा पाँचजना विज्ञसहित २१ जनाको टोली दिक्तेलवजार आइपुगेको थियो ।

सार्वजनिक स्थलहरुमा रहेका कुकरहरुलाई नियन्त्रणमा लिई बन्ध्याकरण स्थल लैजाने काममा मुढेस्थित रणभिम गणले सहयोग गरेको नगरपालिकाले जनाएको छ ।