हलेसीन्युजडेस्क, खोटाङ /

खोटाङका साहित्यकार  टंक भट्टराईको नवीन उपन्यास ठाँटीको घाम सम्बन्धि अन्तरकृयात्मक कार्यक्रम सम्पन्न भएको छ । राष्ट्रिय वाङमय कला प्रतिष्ठानका अध्यक्ष विष्णु आभूषणको अध्यक्षता तथा नेपाल  प्रज्ञा प्रतिष्ठानका सदस्य सचिव डा. धनप्रसाद सुवेदीको प्रमुख आतिथ्यतामा आज दिक्तेलवजार स्थित शुभदिन होटलको सभाहलमा ठाँटीको घाम उपन्यासको अन्तरकृयात्मक कार्यक्रम सम्पन्न भएको हो । 

हाल ताप्लेजुङ जिल्लामा सहायक प्रमुख जिल्ला अधिकारीको जिम्मेवारी सम्हाली रहनु भएका साहित्यकार भट्टराईको जन्म खोटाङ जिल्ला दिक्तेल रुपाकोट मझुवागढी नगरपालिका वडा नं. ४ खाल्लेमा विक्रम सम्वत २०२७ साल असोज  १४ गते भएको हो । सानै उमेरदेखि साहित्य सिर्जनामा लाग्नुभएका भट्रराईका अघिल्ला कृतिहरु साँझमा पहिलो तारा (कविता संग्रह), म पनि बग्दैछु साप्सु (कथा संग्रह) यस अगाडि नै प्रकाशित भैसकेकाछन् ।

आज भएको अन्तरकृयात्मक कार्यक्रममा उपन्यास ठाँटीको घामका सम्बन्धमा वरिष्ठ पत्रकार एवं अग्रज स्रष्टा कृष्ण आचार्यले पुस्तक समिक्षा गर्नुभएको थियो । त्यस्तै कार्यक्रमका प्रमुख अतिथि डा. धनप्रसाद सुवेदी, दिक्तेलरुपाकोट मझुवागढी  नगरपालिकाका नगरप्रमुख एवं सर्जक तीर्थराज भाषित, खोटाङका निमित्त प्रमुख जिल्ला अधिकारी पवित्रप्रकाश शाह, सर्जक टंक थापा, राजनीतिककर्मी प्रकाश श्रेष्ठ, शिक्षाविद धनिराम राई, नेपाल पत्रकार महासंघका अध्यक्ष दिलिप खत्री लगायतले बधाई तथा शुभकामना मन्तव्य दिनुभएको थियो ।

कार्यक्रममा सहभागी सबैलाई सर्जक रेखा राई क्षितिजले स्वागत मन्तव्य द्वारा स्वागत गर्नुभएको थियो भने सर्जक कविहरु चित्र सुवेदी, अनिता प्रकृति, रेखा राई क्षितिज, धनिराम राई, अटल क्रन्तिकारीले विविध कविता तथा सिर्जनाहरु सुनाउनुभएको थियो । सर्जक तथा उपन्यासकार टंक भट्टराईले  उपन्यास लेखनका अनुभवहरु सुनाउनुभएको थियो । 

कार्यक्रमको सहजिकरण सर्जक ओमप्रकाश घिमिरे(अटल क्रान्तिकारी) ले गर्नुभएको थियो । अन्तमा सर्जकलाई बधाई दिदै कार्यक्रमका अध्यक्ष विष्णु आभूषणले कार्यक्रम समापन गर्नुभएको थियो ।