हलेसीन्युजडेस्क, खोटाङ /

कुनै दलका उम्मेदवारले जनतालाई विभिन्न आश्वासन दिएर उनीहरुको मतबाट निर्वाचनमा विजयी बनेपछि आफ्नो कार्यकाल पुरा नहुँदै विदेशमा पलायन भएमा त्यसबाट जनतालाई कति मर्का पर्ला, कति विस्वासघात होला ? राजनैतिक दल र नेतृत्वप्रति जनताको कस्तो चिन्तन बन्ला ? 

खोटाङको साकेला गाउँपालिका वडा नं.४ मात्तिमका वडाध्यक्ष अर्जुनकुमार कटवाल नौँ महिना अगाडिदेखि जनतालाई अप्ठेरोमा पारेर विदेश पलायन भएपछि  यतिखेर यहीँ प्रश्न मात्तिमवासीका वीच उठिरहेको छ । भ्रमण भिसामा कटवाल अमेरिका  गएर नौ महिना वढि विताइ सकेपछि स्थानीय जनताहरुले आजित बनेर वडा कार्यालयमा ताला लगाइदिका छन् । मात्तिमका पूर्ववडाध्यक्ष कृष्णप्रसाद भट्टराईको संयोजकत्वमा गठित सर्वदलीय/सर्वपक्षीय समितिले तत्काल समस्या समाधान गर्न माग गर्दै कात्तिक ७ गते बुधवार वडा कार्यालयमा तालाबन्दी गरेका हुन् ।

श्रोतका अनुसार वि.सं. २०८० माघ १७ गतेदेखि वडामा अनुपस्थित हुँदै आउनुभएका वडाध्यक्ष कटवाल वडा सदस्यलाई कार्यवाहक वडाध्यक्षको जिम्मेवारी दिएर अमेरिका जानुभएको थियो । ज्येष्ठ वडा सदस्य भीमबहादुर खड्कालाई अवधि नतोकी वि.सं. २०८० माघ १९ गते कार्यवाहक वडाध्यक्षको जिम्मेवारी दिएर वडाध्यक्ष कटवाल अमेरिका जानुभएको बुझिन्छ ।

उहाँको अनुपस्थितिमा वडाको महत्वपूर्ण विकास निर्माणका कामका साथै जनताका दैन्दैन्य कामहरुमा वाधा पुगेको बताइन्छ । गाउँ कार्यपालिकाले वडासदस्य भीमबहादुर लाई तीन पटकसम्म कार्यवाहक तोकेको र त्यो अवधि समेत समाप्त भएकोले वडा कार्यालयमा ताला लगाउनुको विकल्प नरहेको पूर्ववडाध्यक्ष भट्टराई बताउनुहुन्छ । उहाँ बताउनुहुन्छ–‘गत साउन २१ गते सर्वदलीय बैठकले १५ दिनभित्र वडाध्यक्ष कटवाल वडामा उपस्थित हुनुपर्ने वा मार्गप्रसस्त गर्नुपर्ने माग सहित गाउँपालिकामा ज्ञापन पत्र बुझाइएको थियो । त्यसपछि गाउँ कार्यपालिकाको बैठकले वडासदस्य भिमबहादुरलाई कार्यबाहक तोकेर वडाको काम सुचारु राखिएकोमा यो अवधि पनि अशोज २० गते सकिएको छ । त्यसपछि सर्वदलीय सर्वपक्षीय बैठकको निर्णय अनुसार बुधवार वडा कार्यालयमा ताला लगाइएको हो । अब सरोकार निकायहरुबाट  यसको उचित निकास खोजिनैपर्छ ।’

ताला लगाएपछि त्यसको जानकारी तथा सर्वपक्षीय सर्वदलीय बैठकको निर्णय सहित निमित्त प्रमुख प्रशासकीय अधिकृत सर्मिला राईलाई बुझाइएको जनाइएको छ । कांग्रेसका स्थानीय नेता बुद्धिवल राई, जीवन श्रेष्ठ, एमाले नेता गोपिकृष्ण खड्का, माओवादी नेता युवराज दुलाल, भोला फुयाल लगायतले तालाबन्दी गरेर गाउँपालिकालाई जानकारी गराइएको थियो । 

गत स्थानयित तहको निर्वाचनमा कटवाल नेपाल कम्युनिष्ट पार्टी (माओवादी केन्द्र) बाट साकेला गाउँपालिका वडा नं. ४ मात्तिमका निर्वाचित वडाध्यक्ष हुनुहुन्छ ।

यतिखेर जनताको घरआँगनमा रहेको स्थानीय सरकारका जनप्रतिनिधिको यो रवैयालाई जिल्लास्तरमा व्यापक आलोचनाको विषय बनाइएको छ ।