रकम नपाएकोमा नगरप्रमुखलाई उजुरी दिने पनि नगरपालिकाबाट सम्मानित

हलेसीन्युजडेस्क, खोटाङ /

खोटाङको दिक्तेल रुपकोट मझुवागढी नगरपालिकाले पत्रकार सम्मेलन गरी नगरपालिकाबाट भैरहेको काम कार्यवाहीका बारेमा जानकारी गराएको छ । नगरपालिकाको तर्फबाट आफ्नै सभाहलमा स्थानीय सञ्चारकर्मीहरुलाई आमन्त्रित गरी नगरप्रमुख तीर्थराज भट्टराई तथा उपप्रमुख वीशन राईले हालसम्म भैरहेको गतिविधि र काम कार्यवाहीका बारेमा आज जानकारी गराएको हो ।

नगरप्रमुख भट्टराईले उपभोक्ताहरुले योजना सम्झौता र फरफारकका लागि व्यहोर्नु पर्ने झन्झटलाई महसुस गरी अब उपभोक्ता समिति वा नगरपालिका मार्फत कार्यक्रम सञ्चालन गर्ने नागरिकहरुलाई त्यस्तो झन्झटबाट मुक्ति दिलाउन योजना कार्यान्वयन पुस्तिका कार्यान्वयनमा ल्याएको बताउनुभयो । नगरप्रमुख भट्टराईका अनुसार नागरिकले पुस्तिकामा उल्लेखित कागजात सहित सम्बन्धित वडाबाट सिफारिस ल्याएर नगरपालिकाको योजना शाखामा बुझाएको सात दिनभित्र भुक्तानी गरिने र नगरपालिकाले फोन मार्फत सम्बन्धित व्यक्तिलाई सोको जानकारी गराइने छ ।

त्यस्तै केहीदिन अगाडि गरिएको नगरपालिकाभित्रका विध्यालयहरुमा शैक्षिक गुणस्तर बढाउन कसको कस्तो भूमिका रहने भन्ने शैक्षिक वहस गराइएको, यसमा स्थानीय सञ्चार माध्यमहरुको ठूलो सहयोग रहेको भन्दै नगरप्रमुख भट्टराईले आगामी दिनहरुमा समेत यस्तो शैक्षिक वहसलाई निरन्तरता दिइने प्रतिवद्धता जाहेर गर्नुभयो ।

गत.अशोज १७ गतेदेखि २१ गतेसम्म पहिलो चरणअन्तर्गत सञ्चालित मुन्दुम अन्तर्राष्ट्रिय चित्रकला प्लेन एयर कार्यशाला तथा कला प्रदर्शनीमा १४ देशका वरिष्ट चित्रकारहरुले सिर्जना गर्नुभएको उत्कृष्ट चित्रकलालाई अब दोश्रो चरण अन्तर्गत नगरपालिकाले यही पौष २७ गते नगरकार्य पालिकाको बैठकबाट निर्णय गरी आगामी फागुन ५ गतेदेखि १७ गतेसम्म काठमाण्डौँको बबरमहलस्थित आर्ट काउन्सिलमा प्रदर्शन गरिने पत्रकार सम्मेलनमा नगरप्रमुख भट्टराईले जानकारी गराउनुभयो । उहाँका अनुसार उक्त प्रदर्शनीमा आजसम्म ४२ देशका वरिष्ठ चित्रकारहरु सहभागी हुनका लागि जानकारी प्राप्त भएको छ । उक्त कार्यक्रममा नेपाल सरकारका उच्चतम व्यक्तित्वहरुबाट उद्घाटन गरिने जनाइएको छ ।

त्यस्तै नगरप्रमुख भट्टराई र उपप्रमुख वीशन राईले गत मंसिर १७ गतेखि पौष ३ गतेसम्म दक्षिण कोरियामा गरिएको अध्ययन अवलोकन भ्रमणका सम्बन्धमा पनि स्पष्ट पारिएको थियो । त्यहाँ रहँदा गरिएका उपलव्धिका वारेमा पनि जानकारी गराइएको थियो । 

पत्रकार सम्मेलन मार्फत नगरप्रमुख भट्टराईले अस्पतालचोकदेखि खानीडाँडा हुँदै आहालेसम्म निर्माणधिन सडक खण्डका विषयमा हालसम्म भएका प्रगति र चुनौतिका विषयमा समेत स्पष्ट बनाउनुभएको थियो । उक्त सडक खण्डको भानुचोकदेखि हाटडाँडासम्म ढलानका काममा आफू ठेकेदारका तर्फबाट जमानत बसी १६ लाख वढीको सामान दिलाएर काम सम्पन्न गराएको तर ठेकदारले तोकिएको समय नाघेर ६ महिना बितिसक्दा पनि हार्डवेयर पसल व्यवसायीलाई रकम उपलव्ध नगराइदिदा आफू विरुद्ध समेत प्रशासनमा उजुरी परेको तर हार्डवेयरका संचालक अभिषेक कर्णले हिम्मतका साथ मेयरलाइ समेत कायर्वाही गर्न तम्सिनुले आफू प्रभावित बनेको बताउनुभयो । यही कारण आज उहाँलाई नगरपालिकाको तर्फबाट सम्मानित गरिएको थियो ।

यस्तै बाम्राङको बाटोमा वेलायतमा रहने बाम्राङवासीले आफ्नो गाउँको सडक निर्माणमा रकम जुटाएर सहयोग गर्नुभएकोमा नगरपालिकाको तर्फबाट उहाँहरुप्रति धन्यवाद प्रदान गरिएको थियो ।

पत्रकार सम्मेलनमा उपप्रमुख वीशन राईले नगरपलिकाको तर्फबाट कृषि क्षेत्रमा भैरहेको गतिविधिका सम्बन्धमा सञ्चारर्मीहरुबाट राखिएका जिज्ञासाहरुको जवाफ दिदै थप स्पष्ट पार्नुभएको थियो ।