हलेसीन्युजडेस्क, खोटाङ

खोटाङ जिल्लाकोे साकेला गाउँपालिकाले आगामी आर्थिक वर्ष २०८०/०८१ को लागि कूल रकम  रु.३३ करोड ८८ लाख ८१ हजारको बजेट  पेस गरेको छ । गाउँपालिकाको सभाहलमा आइतवार सम्पन्न १३ औ गाउँसभाबाट साकेला गाउँपालिकाले आफ्नो नीति, कार्यक्रमका साथ कूल रु. ३३ करोड ८८ लाख ८१ हजारको अनुमानित बजेट पेश गरेकोे हो । 

‘सुसंस्कृत, सँस्थागत र समृद्ध साकेला’ भन्ने मूल नाराका साथ गाउँपालिका अध्यक्ष रविप्रकाश राईको अध्यक्षतामा भएको गाउँसभामा उपाध्यक्ष विर्सिका राईले नीति, कार्यक्रम तथा वजेट प्रस्तुत गर्नुभएको थियो ।  उपाध्यक्ष राईले गाउँपालिकाकोे चालु आर्थिक वर्ष २०७९/०८० मा रु. ३७ करोड ७४ लाख ७५ हजार रकम विनियोजन गरेकोमा असार ८ गतेसम्म रु. २६ करोड ४७ लाख १८ हजार रकम अर्थात कूल बजेटको ६२.४५ प्रतिशत मात्र खर्च भएको विवरण सुनाउनुभएको थियो ।

त्यस्तै उपाध्यक्ष राईले  आगामी आर्थिक वर्ष २०८०/०८१ मा सञ्चालन गरिने प्रमुख कार्यक्रमहरु र विनियोजित बजेट विवरण प्रस्तुत गर्दै आय तर्फ नेपाल सरकार अर्थ मन्त्रालयबाट प्राप्त वित्तीय समानीकरण अनुदान अन्तर्गत रु.७ करोड ११ लाख , राजश्व वाँडफाँडबाट रु. ६ करोड ७९ हजार , सशर्त अनुदान तर्फ रु. १६ करोड ४१ लाख  र विशेष अनुदान तर्फ रु. १ करोड ५० लाखको वजेट रहेको बताउनुभयो । 

त्यसैगरी प्रदेश सरकारबाट प्राप्त वित्तीय समानीकरण अनुदान रकम रु. ४० लाख ९४ हजार , सवारी कर वाँडफाँडबाट रु.२७ लाख ५३ हजार, प्रदेश सशर्त अनुदान चालु रु. २९ लाख ३० हजार मात्र रहेको उल्लेख गर्नुभयो ।

संघको समपुरक अनुदान रकम रु. १ करोड ३५ लाख, आ.व. २०७९/०८० को राजश्व संकलन दरलाई समेत आधार मानी आर्थिक वर्ष २०८०/०८१ का लागि प्रक्षेपित राजश्व रकम रु. १५ लाख जम्मा आम्दानी रकम रु. ३३ करोड ८८ लाख ८१ हजार हुने जनाइएको छ ।

यसरी संघीय सरकार, प्रदेश सरकारबाट प्राप्त हुने रकम र पालिकाको आन्तरिक राजश्व संकलनबाट प्राप्त रकम चालु तथा पूँजीगत गरेर आगामी आर्थिक वर्ष २०८०/०८१ को लागि कुल बजेट सिमाङ्क रकम रु. ३३ करोड ८८ लाख ८१ हजार वजेटको प्रक्षेपित अनुमान गरिएको छ ।

त्यस्तै आगामी आर्थिक वर्ष २०८०/०८१ मा खर्च वजेटको विवरण समेत पेश हुँदा चालु तर्फ रु. २१ करोड ९३ लाख ५७ हजार रुपैंया, पूँजीगत तर्फ रकम रु. ११ करोड ९५ लाख २४ हजार गरेर यसरी सवै क्षेत्रको कुल रुकम रु. ३३ करोड ८८ लाख ८१ हजारको प्रक्षेपित अनुमान गरिएको उल्लेख छ ।

आइतवार पेश भएको कार्यक्रममा साकेलाको वृहत पर्यटकीय क्षेत्रको विकास गरी आगामी चार वर्षभित्र नमूना पालिका बनाउने योजना रहेको छ ।  

साकेलाको गौरवको योजनाहरुलाई पुरा गर्न संघ तथा प्रदेश सरकारसँग निरन्तर समन्वय गरिने अध्यक्ष राईले बताउनुभयो । तावाभञ्ज्याङ क्षेत्रमा वृहत्त पर्यटन पूर्वाधार विकास अन्तर्गत हाल तावाताल निर्माणको मात्र विस्तृत परियोजना तयार भईसकेकाले यसलाई अध्ययन गरि आवश्यकता अनुसार परिमार्जन गरि कार्य अघि बढाईने समेत कार्यक्रममा उल्लेख छ ।  पछिल्लो समय साकेलाबाट बसाई सर्नेहरुको संख्या बढिरहेको कारण जनसंख्या दिनानुदिन घटिरहेको अवस्थामा गाउँपालिकाले नयाँ नीति अपनाउने उल्लेख  छ । गाउँपालिकाले जनसंख्यालाई सन्तुलनमा राख्नका लागि अन्यत्रबाट बसाईसरी आउने परिवारलाई सम्मान स्वरुप रु.५ हजार रकम उपलब्ध गराउने जनाइएको छ ।