हलेसीन्युजडेस्क, खोटाङ /

खोटाङको साकेला गाउँपालिका वडा नम्बर ४ मात्तिमको वडाध्यक्ष अर्जुन कुमार कटवाल लामो समयसम्म कार्यालयमा अनुपस्थित भएको भन्दै वडा कार्यालयमा लगाईएको ताला सहमतिमा खोलिएको छ । वडाध्यक्ष कटवाल अमेरिका गएर लामो समयसम्म नफर्किएपछि जनताले सास्ती पाएको भन्दै सर्वदलीय/सर्वपक्षीय  अगुवाईमा बुधबार वडा कार्यालयमा लगाइएको तालाबन्दी अशोज ९ गते शुक्रवार वडाध्यक्ष विरुद्ध कानूनी प्रक्रिया अघि बढाउने गाउपालिकाका जनप्रतिनिधि र आन्दोलनरत पक्षवीच सहमति भएपछि वडा कार्यालयमा लगाईएको ताला खुलाईएको हो ।

गाउँपालिका अध्यक्ष रविप्रकाश राईसँग आन्दोलनरत पक्षको फोन सम्पर्कमा वडाध्यक्ष कटवाललाई कार्यालयको तर्फबाट थप आवश्यक कानूनी प्रकृया सुरु गर्न सम्बन्धित निकायलाई पहल गर्ने सहमति भएसँगै गाउँपालिका उपाध्यक्ष बिर्सिका राई, निमित्त प्रमुख प्रशासकीय अधिकृत सर्मिला राई तथा आन्दोलनरत पक्षको तर्फबाट संयोजक कृष्णप्रसाद भट्टराई, स्थानीय राजनीतिककर्मी गोपिकृष्ण खड्का, प्रहरी प्रशासनको तर्फबाट वरिष्ठ प्रहरी नायव निरिक्षक सुरेश लामा सहित राजनैतिक दलका प्रतिनिधिहरुले सोही बमोजिम उल्लेख गरी सहमतिपत्रमा हस्ताक्षर गर्नुभएको छ ।

वडाध्यक्ष कटवाल निर्वाचित भएपछि २०७९ सालमा पनि अढाई महिना अमेरिका रहेर स्वदेश फर्किनुभएको थियो । दोश्रो पटक २०८० माघ १७ गतेदेखि वडामा अनुपस्थित हुँदै अमेरिका गएको कटवाल हालसम्म फर्किनुभएको छैन । स्थानीयका अनुसार वडाबाट दैनिक रुपमा सम्पादन गर्नुपर्ने विकास निर्माण, प्रशासनिक र सेवाग्राहीको काम रोकिएर सेवाग्राहीले दुःख पाइरहेका छन् । नौ महिना बित्दा पनि वडाध्यक्ष कट्वाल वडामा नफर्केपछि बाध्य बनेर बुधवार सर्वदलीय सर्वपक्षीय अगुवाइमा वडा कार्यालयमा तालाबन्दी गरिएको थियो ।

पूर्ववडाध्यक्ष भट्टराइ भन्नुहुन्छ –‘वडामा ताला लगाउनु रहर होइन वाध्यता थियो । कम्तिमा पनि जिम्मेवारी पूरा नगर्ने जनप्रतिनिधिका विरुद्धमा कानूनी प्रकयाबाट समाधान खोजिने भएपछि ताला खोलिएको हो ।’

गत स्थानीय तहको निर्वाचनमा कटवाल नेकपा माओवादी केन्द्रका तर्फबाट साकेला गाउँपालिका वडा नं. ४ मात्तिमको वडाध्यक्षमा निर्वाचित हुनुभएको थियो ।

[यो पनि-वडाध्यक्षको विदेश पलायनबाट आजित मात्तिमे जनताले वडा कार्यालयमा गरे तालावन्दी ]