हलेसीन्युजडेस्क, खोटाङ /

नेपाली कांग्रेस वातावरण तथा जलवायु परिवर्तन सराकोर विभागद्धारा आयोजित वातावरण तथा जलवायु परिवर्तन सम्बन्धि ३० दिने प्रशिक्षण कार्यक्रम कांग्रेस केन्द्रीय कार्यालयमा सुरु भएको छ । विश्वमा तिव्र जलवायु परिवर्तनका कारण वातावरणमा परेको प्रभाव र यसबाट हुने तत्कालिन र दीर्घकालिन असरका बारेमा जानकारी गराउने उद्धेश्यले नेपाली कांग्रेस वातावरण तथा जलवायु परिवर्तन सराकोर विभागले वीपी स्मृति भवन सानेपामा आषाढ २ गतेदेखि ३० दिनसम्म प्रशिक्षण कार्यक्रम सञ्चालन भैरहेको  विभागका प्रमुख कल्याण गुरुङले जानकारी गराउनुभयो ।

पहिलो दिन पुर्व वन सचिव डा.कृष्णप्रसाद आचार्य, त्रिभुवन विश्वविद्यालयका प्रध्यापक रविन्द्र न्यौपाने, पोखरा विश्वविद्यालयका सहप्राध्यापक प्रविणकुमार रेग्मीले तालिमको सहजीकरण गर्न भएको थियो भने बन मन्त्री ऐन बहादुर शाहीले विश्वमा तिव्र जलवायु परिवर्तनका कारण वातावरणमा परेको प्रभाव न्यूनिकरणका लागि काग्रेसले शुभारम्भ गरेको यो अभियानलाई स्थानीय स्तरसम्म पुर्याउन जरुरी रहेको बताउनुभयो ।  कांग्रेस वातावरण विभागको आयोजनामा भएको उक्त कार्यक्रममा विभागीय प्रमुख कल्याणकुमार गुरुङले वीपी कोईरालाको तस्बिरमा माल्यार्पण गर्दै आषाढ २ गते कार्यक्रमको शुभारम्भ गर्नु भएको थियो ।

कार्यक्रममा कांग्रेस समर्थक विभिन्न जिल्लाका १०० जनाको सहभागिता रहेको छ । नेपाली कांग्रेस खोटाङबाट ध्यानबहादुर राई, लोकनाथ घिमिरे, प्रतिक्षा राई तथा निर्मला ढकालले तालिममा सहभागिता जनाउनु भएको खोटाङ कांग्रेसले जनाएको छ ।

तालिमको दोश्रो दिन त्रिभुवन विश्व विद्यालय बन विज्ञान अध्ययन संस्थानका उप प्राध्यापक डा. राजेश राई र डब्लु डब्लु एफ नेपालका कन्ट्री डाईरेक्टर डा. घनश्याम गुरुङले सहजीकरण गर्नु भएको छ । तालिमको  साउन ६ गते वीपी स्मृति दिसको अवसर पारेर समापन गरिने आयोजकले जनाएको छ ।

नेपाली कांग्रेसका केन्द्रीय सदस्य एवं पूर्व मन्त्री ढुण्डीराज शास्त्रीको निधन भएकोले काग्रेसले उहाँको सम्मानमा ३ दिन सम्म आधाझण्डा झुकाई शोक मनाउने तथा औपचारिक कार्यक्रम संचालन नगर्ने भएकोले ३ दिन सम्म तालिम पनि स्थगन भएको काग्रेस वातावरण विभागले जनाएको छ ।